იონა მირცხულავა

დაბადების ადგილი: სოფელი ხორგა, ხობის რაიონი.

დაამთავრა ლენინგრადის პოლიტექნიკური ინსტიტუტი 1935 წელს.

1935 წელს მუშაობა დაიწყო თბილისის სახელმწიფო უნივერსიტეტში ზოგადი ფიზიკის კათედრაზე ასისტენტად; 1938–1950წწ. იყო თბილისის სახელმწიფო სამედიცინო ინსტიტუტის (ახლანდელი თსსუ) ფიზიკის კათედრის გამგე; 1954–1965წწ. და 1972–1980წწ. თბილისის სახელმწიფო უნივერსიტეტის მყარი სხეულის ფიზიკის კათედრის გამგე; 1957–1965წწ. აგრეთვე ხელმძღვანელობდა თავისივე ინიციატივით დაარსებულ ნახევარგამტარებლების ფიზიკის პრობლემურ ლაბორატორიას. 1965 წელს მისი თაოსნობით თბილისში გაიხსნა ნახევარგამტარული ხელსაწყოების ინსტიტუტი, რომელსაც ხელმძღვანელობდა 1972 წლამდე. ავტორია სამეცნიერო ნაშრომებისა, რომლებიც ეხება მყარი სხეულისა და ნახევარგამტარების ფიზიკას. თანამშრომლებთან ერთად შეისწავლა ნახევარგამტარებში დაბალტემპერატურული გარღვევის მოვლენა, რომლის საფუძველზე შეიქმნა ახალი ტიპის ნახევარგამტარული ხელსაწყოები. არის რამდენიმე სახელმძღვანელოს ავტორი. ეწეოდა ნაყოფიერ პედაგოგიურ მოღვაწეობას. მიღებული აქვს სახელმწიფო ჯილდოები.  ფიზიკა-მათემატიკის მეცნიერებათა დოქტორი (1950), პროფესორი (1950).

წყარო: ქართული საბჭოთა ენციკლოპედია: ტ.7.-თბ., 1984.-გვ.14; საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge

• 1975 - საქართველოს მეცნიერებათა დამსახურებული მოღვაწე
• 1975 - საქართველოს სახელმწიფო პრემია (სხვებთან ერთად)
• შრომის წითელი დროშის ორდენი

• ნახევარგამტართა ფიზიკა : დამხმ. სახელმძღვ. ფიზიკის ფაკ-ტის სტუდენტებისათვის (ავტორი). - თბილისი, თბილ. უნ-ტის გამ-ბა, 1979. - 408გვ.
• ზოგადი ფიზიკის სახელმძღვანელო : მექანიკა და მოლეკულური ფიზიკა (ავტორი). - თბილისი, თბილ. უნ-ტის გამ-ბა, 1960. - 582გვ.
• სტატისტიკური ფიზიკა და თერმოდინამიკა (ავტორი). - თბილისი, თბილ. უნ-ტის გამ-ბა, 1957. - 407გვ.
• ზოგადი ფიზიკა : მოკლე სახელმძღვანელო (ავტორი). - თბილისი, საქმედგამი, 1946. - 406გვ.