გიორგი გორდეზიანი

დაბადების ადგილი: სოფელი საკაო, ონის რაიონი.

დაამთავრა ქუთაისის სასულიერო სემინარია 1904 წელს; ხარკოვის უნივერსიტეტის იურიდიული ფაკულტეტი.

სწავლა განაგრძო ტომსკის უნივერსიტეტში, საიდანაც დაითხოვეს რევოლუციურ მოძრაობაში აქტიური მონაწილეობის გამო (მონაწილეობდა სადგურ ტაიგის დეპოსა და ციმბირის დიდი რკინიგზის ხაზის გაფიცვებში). 1905 წელს გიორგი გორდეზიანმა თბილისში შექმნა ანარქისტ-კომუნისტების ჯგუფი, რომელმაც გამოსცა ჟურნალი "ნობათი", ყოველდღიური გაზეთი "მუშა" და ჟურნალი "ცის ნამი" (იყო რედაქტორი). იგი ამ გამოცემებში 1908 წლამდე აქვეყნებდა პოლიტიკური ხასიათის წერილებს. წერდა სვანეთის გლეხობის მდგომარეობის, სახელმწიფო სათათბიროს, არჩევნების, რევოლუციური მოძრაობის გაძლიერების, სოციალური რევოლუციის პერსპექტივების, სოციალ-დემოკრატების, ეგზარქოს ნიკონის მკვლელობის შესახებ. თარგმნა პ. კრაპოტკინის "თამამედროვე მეცნიერება და ანარქიზმი" (გამოც. შ. გოგელიასი, ტფ., 1908, 96 გვ.; მთარგმნელი არ აწერია), მისივე რედაქტორობით გამოვიდა შ. გოგელიას "კრიტიკა სოციალ-ფედერალიზმისა" და კ. ორგეიანის "კრიტიკა სოციალ-დემოკრატიისა" (ტფ., 1908, 312 გვ., კონსპირაციული მოსაზრებით, გამომცემელად მოხსენიებულია შ. ღამბაშიძე). გიორგი გორდეზიანი 1916 წლიდან თანამშრომლობდა ყოველდღიურ გაზეთ "საქართველოსთან" და ყოველკვირეულ "კლდესთან" (დახურვამდე), სადაც წერდა ომის შედეგების, გადასახადების, რუსიფიკატორების, სასამართლოსა და სხვა საკითხების შესახებ. 1908 წელს ჟურნალ "ცის ნამის" ხელმძღვანელობისათვის თბილისის სასამართლო პალატამ პასუხისგებაში მისცა და 1912 წლის 19 იანვარს 129 მუხლის პირველი ნაწილით გაასამართლა. 1909 წლის 22 ივლისიდან 1910 წლის 6 მარტამდე მეტეხის ციხეში იხდიდა სასჯელს პოლიციის უბნის აფეთქების გამო. რევოლუციონერი.

წყარო: ქართველ მოღვაწეთა ლექსიკონი, 1801-1952: ტ. I ა-დ / იოსებ იმედაშვილი.-თბ.,2018.-გვ.701