ბორის კაზინეცი

დაბადების ადგილი: ქ. მოსკოვი.

1952 წელს დაამთავრა მოსკოვის ა. ლუნაჩარსკის სახელობის თეატრალური ხელოვნების ინსტიტუტის სამსახიობო ფაკულტეტი 1952 წელს.

ინსტიტუტის დამთავრების შემდეგ, მუშაობა დაიწყო ნოვოჩერკასკის დრამატულ თეატრში. სხვა­და­სხვა წლებში მუ­შა­ობ­და ნოვოჩერკასკის (1952-1953), საბჭოთა არმიის (1954-1955), როსტოვის კომედიის (1955-1958) და მ. გორკის სახელობის დრამატული (1958-1960; 1971-1974), პერმის დრამა­ტუ­ლი (1960-1964), თბილისის გრიბოედოვის (1964-1968), რიაზანის (1968-1970), მინსკის მ. გორკის სახელობის (1970-1971) თეატრებში; 1974 წლიდან თბილისის გრიბოედოვის სახელობის დრამატული თეატრის მსახიობია; 1991 წლიდან ცხოვრობს აშშ-ში; 1992 წელს ვა­შინგტონის გარეუბანში დაა­ფუძნა მოყვარულთა თეატრი, რომელსაც მოგვიანებით "ბორის კაზინეცის თეატრი" ეწოდა, ხოლო შემდეგ – "რუსული კლასიკის თეატრი"; მას განსახიერებული აქვს 200- ზე მეტი როლი. თბილისის გრიბოედოვის სახელობის თეატრის სცენაზე შექმნილი როლებიდან აღსანიშნავია: არისტახი, ჯადოქარი (ვ. შუკშინის "ენერ­გიული ადამიანები", "თვალსაზრისი"), ქალაქკომის მდივანი (ა. ჩხაიძის "როცა ქალაქს სძინავს"), ზურაბ მოდრეკილაძე (ვ. იაქა­შვი­ლის "ჰორიზონტს იქით"), იოჰან ვილჰელმ მებიუსი (ფ. დიურენმატის "ფიზიკოსები"), შეფი (ა. კოტეტი­შვი­ლის "სამოთხის ვაშლები“), ბურგომისტრი (გ. გორინის "შემწვარი იხვის ფრენა"), ფილიპ ლუტიკოვი (ა. ფადეევის "ახალგაზრდა გვარდია"), იგორ გორჩაკოვი (ი. დვორეცკის "გაცილება"), პეტრე რიზაევი (ა. კაზანცევის "ძველი სახლი") და სხვა; მსახიობი წარმატებით ასახიერებს დრამატულ, სახასიათო და კომედიურ როლებს, რაც მის ფართო სამსახიობო დიაპაზონზე მეტყველებს. მისი საშემსრულებლო კულტურა გამოირჩევა დახვეწილი გემოვნებით, მოქალაქეობრივი პოზიციების სიმკვეთრითა და მიზანდასახულობით.

წყარო: საქართველო: ენციკლოპედია: ტ. IV. -თბ., 2018. -გვ.461-462

• 1983 - სა­ქართველოს სახალხო არტისტი