ალიმ თვალთვაძე

დაბადების ადგილი: სოფელი გაღმა ჩუნეში, წყალტუბოს რაიონი.

დაამთავრა ქუთაისის ქართული გიმნაზია 1921 წელს და მუშაობა დაიწყო გაღმა ჩუნეშისა და ყუმისთავის არასრულკომპლექტიან სკოლის გამგე-მასწავლებლად. 1923-1927წწ. იმყოფებოდა წითელი არმიის რიგებში; 1927 წელს მუშაობა დაიწყო ქუთაისის წერა-კითხვის გამავრცელებელ საზოგადოებაში მასწავლებლად; 1934 წელს დაამთავრა თბილისის სახელმწიფო უნივერსიტეტის ბუნებისმეტყველების ფაკულტეტი გეოგრაფიის განხრით. იმავე წელს მუშაობა დაიწყო ქუთაისის პედაგოგიურ ინსტიტუტში ფიზიკური გეოგრაფიის კათედრაზე. კითხულობდა ლექციებს სსრკ ფიზიკურ გეოგრაფიაში, გეოგრაფიის სწავლების მეთოდიკასა და ბუნების დაცვაში. შეთავსებით მუშაობდა ქუთაისის I საცდელ-სანიმუშო სკოლაში გეოგრაფიის მასწავლებლად, ქუთაისის ოფიცერთა სახლში. მოღვაწეობდა მასწავლებელთა დახელოვნების ინსტიტუტში; 1946-1948წწ. მიწვეულ იქნა და პარალელურად მუშაობდა ჯერ სოხუმის პედაგოგიურ და შემდეგ ზუგდიდის სამასწავლებლო ინსტიტუტებში. პედაგოგიურ საქმიანობასთან ერთად ეწეოდა სამეცნიერო მოღვაწეობასაც. წლების მანძილზე აღმოაჩინა და შეისწავლა წყალტუბოს ზონის ტერიტორიაზე კირქვულ სივრცეებში არსებული მღვიმეები და მღვიმური ჭები (საწურბლია, სოლკოტა, საქაფია და სხვ.). შესრულებული აქვს 44 სამეცნიერო ნაშრომი, რომელთა მეტი ნაწილი გამოქვეყნებულია. იკვლევდა დასავლეთ საქართველოს ბუნებას. წლების მანძილზე იყო საქართველოს გეოგრაფიული საზოგადოების ქუთაისის ფილიალის თავმჯდომარე. 1980 წელს აირჩიეს საზოგადოების საპატიო წევრად. მისი ხელმძღვანელობით შეიქმნა ჯერ თბილისში, შემდეგ სოფელ გაღმა ჩუნეშში ცნობილი მწერლის და საზოგადო მოღვაწის ნიკო ლორთქიფანიძის სახლ-მუზეუმი. მიღებული აქვს სახელმწიფო ჯილდოები, მათ შორის "სახალხო განათლების წარჩინებულის" სამკერდე ნიშანი (1940, 1985). გეოგრაფიულ მეცნიერებათა კანდიდატი, დოცენტი.

საკანდიდატო დისერტაციის თემა - "ჩრდილო-დასავლეთ იმერეთის ფიზიკურ-გეოგრაფიული (ლანდშაფტური) დახასიათება", დაიცვა 1968 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.133-134

• 1982 - საქართველოს უმაღლესი სკოლის დამსახურებული მუშაკი