ნიკოლოზ ჯანდიერი

დაბადების ადგილი: ქ. ზაქათალა (საინგილო), აზერბაიჯანი.

დაამთავრა ხარკოვის უნივერსიტეტის სამკურნალო ფაკულტეტი 1899 წელს.

დახელოვნდა ავსტრიაში პროფესორ აიზელსბერგისა და ნოტნაგელის კლინიკებში, გერმანიაში - პროფესორ ბორისა და ბერგმანის კლინიკებში; მუშაობდა სოფელ კასტორნაიაში (რუსეთი) საექიმო პუნქტის გამგედ; 1904 წელს ჩამოვიდა საქართველოში და სიღნაღის მაზრის ექიმად დაინიშნა; 1904-1917 წლებში სიღნაღში მოღვაწეობის პერიოდში გახსნა აფთიაქები სოფელ ვაქირში, ანაგაში, ბაკურციხეში, აფენში, გურჯაანში; სოფლის სამკურნალოები: ბაკურციხესა და გურჯაანში; საფერშლო პუნქტები: ქოდალაში, კელმეჩურში, ჭიაურში; ოთხსაწოლიანი სასკოლო საავადმყოფო ბოდბის მონასტრის სემინარიის მოსწავლეთათვის; ეწეოდა ქველმოქმედებას - ყოველ წელს სიღნაღის მარინეს სახელობის სასწავლებლის 30 ქალსა და 10 ვაჟს დაწყებით კლასებში უხდიდა სწავლის ქირას (40 მან. წელიწადში თითო ბავშვი); მისი უშუალო თავდადებული შრომის შედეგად მარინეს სკოლა პროგიმნაზიად გადაკეთდა; იყო სიღნაღის სასამართლოს ექსპერტი ექიმი; დედათა და ბავშვთა განყოფილების გამგე; 1922-1923წწ. თბილისის პარტახტიანი ტიფის ბარაკების გამგე; 1923-1930წწ. თბილისის ჯანმრთელობის განყოფილების სასკოლო ინსპექტორი; ამავე სკოლების ჰიგიენის მასწავლებელი; თბილისის სახელმწიფო სამედიცინო ინსტიტუტის სამკურნალო ფაკულტეტის ქირურგიის კათედრის ასისტენტი. მონაწილეობდა კახეთის რკინიგზის მშენებლობაში, 1914 წელს იყო რკინიგზის სადგურის მიმღები კომისიის წევრი. მისი ინიციატივით სიღნაღში გაიხსნა წიგნის მაღაზია, დაარსდა სასოფლო-სამეურნეო ბანკი, ფოსტა-ტელეგრაფის განყოფილება. იყო ილია ჭავჭავაძის პირადი მკურნალი.

წყარო: კახეთის გამოჩენილი ადამიანები/ოთარ ნაცარაშვილი.-თბ.,2001.-გვ.316; საქართველოს სამედიცინო კალენდარი: ნაწ.I : 2 ნაწილად / ჯუმბერ ქორჩილავა.-თბ.,2010.-გვ.720  

• ქართველთა შორის წერა-კითხვის გამავრცელებელი საზოგადოების სიღნაღის სამაზრო განყოფილება, თავმჯდომარე (1910-)

• 1959 - საქართველოს დამსახურებული ექიმი