ნიკოლოზ ჯანდიერი

დაბადების ადგილი: ქ. ზაქათალა (საინგილო), აზერბაიჯანი.

ქართული სათავადაზნაურო ბანკის სტიპენდიით ჩაირიცხა ხარკოვის უნივერსიტეტის სამკურნალო ფაკულტეტზე, რომელიც დაამთავრა 1899 წელს.

დახელოვნდა ავსტრიაში პროფესორ აიზელსბერგისა და ნოტნაგელის კლინიკებში, გერმანიაში - პროფესორ ბორისა და ბერგმანის კლინიკებში. მუშაობდა სოფელ კასტორნაიაში (რუსეთი) საექიმო პუნქტის გამგედ. 1904 წელს ჩამოვიდა საქართველოში და სიღნაღის მაზრის ექიმად დაინიშნა. 1904-1917წწ. სიღნაღში მოღვაწეობის პერიოდში გახსნა აფთიაქები სოფელ ვაქირში, ანაგაში, ბაკურციხეში, დედოფლისწყაროში, კელმეჩურში, ჭიაურაში; საფერშლო პუნქტი სოფელ ნოვოალექსეევკაში. ნიკოლოზ ჯანდიერმა ბოდბის დედათა მონასტრის სემინარიის მოსწავლეთათვის და მონაზვნებისათვის ოთხსაწოლიანი სასკოლო საავადმყოფო გახსნა;იგი მონაწილეობდა კახეთის რკინიგზის მშენებლობაში, 1914 წელს იყო რკინიგზის სადგურის მიმღები კომისიის წევრი. მისი ინიციატივით სიღნაღში გაიხსნა წიგნის მაღაზია, დაარსდა სასოფლო-სამეურნეო ბანკი, ფოსტა-ტელეგრაფის განყოფილება. იყო ილია ჭავჭავაძის პირადი მკურნალი.

წყარო: კახეთის გამოჩენილი ადამიანები/ოთარ ნაცარაშვილი.-თბ.,2001.-გვ.316

• ქართველთა შორის წერა-კითხვის გამავრცელებელი საზოგადოების სიღნაღის სამაზრო განყოფილება, თავმჯდომარე (1910-)

• საქართველოს დამსახურებული ექიმი