ვიტალი ჭკუასელი

დაბადების ადგილი: სოფელი საჭამიასერი, ჩოხატაურის რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი ინჟინერ-ჰიდროტექნიკოსის სპეციალობით 1969 წელს.

1969 წელს მუშაობა დაიწყო საწარმო-სამშენებლო ტრესტ "საქჰიდროენერგომშენში", ენგურის ჰესების კასკადის მშენებლობაზე "ვარდნილჰესის" სამმართველოში, ჯერ ოსტატის, შემდეგ სამუშაოთა მწარმოებლის და უბნის უფროსის თანამდებობებზე; 1972 წელს დაინიშნა ენგურჰესის "კაშხალმშენის" სამმართველოს უფოსად, რომელიც აწარმოებდა თაღოვანი კაშხლის მშენებლობას; 1980 წელს ტრესტ "საქჰიდროენერგომშენის" მიერ მივლინებული იყო ერაყის რესპულიკაში ხადიტა ჰესის მშენებლობაზე; 1983 წელს დაბრუნდა საქართველოში "კაშხალმშენის" სამმართველოში მთავარი ინჟინრის მოადგილედ, სამმართველოს უფროსად; 1991 წელს მუშაობას იწყებს გაერთიანება "თბილავიამშენის" სამშენებლო სამმართველოში მთავარ ინჟინრად; 2004 წელს ინიშნება ენგურჰესის სარეაბილიტაციო სამუშაოების სამმართველოს უფროსის მოადგილედ; 2013 წლიდან არის სამხრეთ კორეის ფირმა "დოჰკას" თანამშრომელი ანაკლიის ზღვის ნაპირსამაგრი სამუშაოების დამკვირვებელი; 2018 წლიდან არის საინჟინრო ჯგუფის დამკვირვებელი საშუალო ჰესის მშენებლობაზე; მონაწილეობდა ენგურჰესის, მისი თაღოვანი კაშხლის, თბილისის აეროპორტის ასაფრენ-დასაფრენი ზოლის, ანაკლიის ნაპირსამაგრი სამუშაოების მშენებლობაში, ასევე ერაყის ხადიტა ჰესის მშენებლობაზე; მრავალწლიანი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 314-315