ლიანა ქანდარია

დაბადების ადგილი: ქ. მარტვილი.

დაამთავრა საქართველოს პოლიტექნიკური ინსტიტუტის ენერგეტიკის ფაკულტეტი 1962 წელს და მიენიჭა ინჟინერ-ელექტრიკოსის კვალიფიკაცია.

მუშაობა დაიწყო "საქმთავარენერგოში" დისპეტჩერად; 1963 წლიდან - რეჟიმების სამსახურში ინჟინრად, ჯგუფის ხელმძღვანელად, გამოთვლითი ტექნიკის სექტორის უფროსად. მისი საქმიანობის ძირითადი მიმართულებებია ენერგოსისტემის რეჟიმების მართვა და ოპტიმიზაცია; ენერგოსისტემის ყველა ობიექტზე ენერგოსისტემის სახასიათო დღეებში (ზამთრის მაქსიმალური და ზაფხულის მინიმალური) ფაქტიური დატვირთვების, ძაბვის მნიშვნელობების ჩვენებების მრიცხველების მიხედვით აღების ორგანიზება, დამუშავება და ელექტრული სქემის შედგენა. მან პირველმა დანერგა გამოთვლითი ტექნიკის გამოყენებით ენერგოსისტემის ნორმალური რეჟიმის, სტატიკური და დინამიკური მდგრადობის პროგრამები. გაიარა ხელმძღვანელი მუშაკების და სპეციალისტების კვალიფიკაციის ასამაღლებელი კურსები მოსკოვში, ლენინგრადსა და კიევში, სწავლება ენერგეტიკის მენეჯმენტში. წლების განმავლობაში იყო ენერგეტიკის ფაკულტეტის ელექტრული ქსელების და სისტემების სპეციალობის სტუდენტების დიპლომის ხელმძღვანელი. გამოქვეყნებული აქვს სტატიები.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.332-333

• საქართველოს დამსახურებული ენერგეტიკოსი