რევაზ ობოლაძე

დაბადების ადგილი: სოფელი ცუცხვათი, ტყიბულის რაიონი.

დაამთავრა საქართველოს სასოფლო-სამეურნეო ინსტიტუტის სატყეო ფაკულტეტი 1960 წელს; ასპირანტურა 1965 წელს. 

მუშაობა დაიწყო საქართველოს სატყეო და ქაღალდის მრეწველობის სამმართველოს საპროექტო-საკონსტრუქტორო ბიუროში ინჟინრის თანამდებობაზე; 1961 წელს გადაყვანილ იქნა ინჟინერ-ნორმადარად თბილისის საავეჯო კომბინატში; 1966 წელს დაიცვა დისერტაცია და მიენიჭა ეკონომიკურ მეცნიერებათა კანდიდატის სამეცნიერო ხარისხი. 1965-1968წწ. მუშაობდა სატყეო მეურნეობის სისტემაში: საპროექტო-საკონსტრუქტორო ბიუროს შრომის ნორმატიულ-კვლევითი ლაბორატორიის გამგედ, სპეციალური საპროექტო-საკონსტრუქტორო და ტექნოლოგიური ბიუროს ჯგუფის უფროსად, საკავშირო საპროექტო ინსტიტუტ "სოიუზგიპროლესტრანსის" საქართველოს ფილიალში ტყის სანედლეულო ბაზების ათვისების და ხე-ტყის გადამამუშავებელ საწარმოთა დაპროექტების ტექნიკურ-ეკონომიკური დასაბუთების უფროს ინჟინერ-ეკონომისტად; 1968-1973წწ. იყო საქართველოს მეცნიერებათა აკადემიის თბილისის ტყის ინსტიტუტის უფროსი მეცნიერ-თანამშრომელი; 1973-1990წწ. სხვადასხვა დროს მუშაობდა საქართველოს სატყეო მეურნეობის სახელმწიფო კომიტეტის დაქვემდებარებაში მყოფ ეკონომიკური ანალიზისა და ფასწარმოქმნის ლაბორატორიის, ეკონომიკური კვლევის ცენტრალური სამეცნიერო-საწარმოო ლაბორატორიის უფროსად; 1991-2000წწ. სხვადასხვა დროს ხელმძღვანელობდა სატყეო მეურნეობის ეკონომიკის ინფორმატიკის დარგობრივ ლაბორატორიას, ეკონომიკური ანალიზის და სტრატეგიული დაგეგმვის ლაბორატორიას; 1994 წელს დააფუძნა თბილისის კვების მრეწველობის ტექნოლოგიურ ინსტიტუტში სატყეო-საინჟინრო ფაკულტეტი; 1965-1980წწ. კითხულობდა ლექციების კურსს სასოფლო-სამეურნეო ინსტიტუტში; 2008 წელს დააფუძნა დარგობრივი პერიოდული გამოცემა ჟურნალი "სატყეო მოამბე". გამოქვეყნებული აქვს 30-ზე მეტი შრომა ტყის მეურნეობის და სატყეო მრეწველობის ეკონომიკის და მართვის საკითხებზე.  

წყარო: ასი უბერებელი მეტყევე: ქართველ მეტყევეთა ბიოგრაფ. ცნობები/ანზორ ჩაფიძე.-თბ.,2009.-გვ.77

• საქართველოს კვების მრეწველობის საზოგადოებრივ მეცნიერებათა აკადემია, აკადემიკოსი (2003-)