ჯოტო ემუხვარი

დაბადების ადგილი: სოფელი ოქუმი (სამურზაყანო), გალის რაიონი.

ჯოტო ემუხვარი სრულიად ახალგაზრდა ასაკში შეუერთდა ქართული არმიის რიგებს, 1921 წლის ბოლშევიკური ოკუპაცია რომ არა, მას ბრწყინვალე სამხედრო კარიერა ექნებოდა. ემიგრაციაში ყოფნისას, 1924 წელს, საფრანგეთში საქართველოს საგანგებო დესპანისა და სრულუფლებიანი მინისტრის, აკაკი ჩხენკელის შუამდგომლობით ჯოტო ემუხვარმა სომიურის კავალერისტთა ცნობილ სკოლაში ჩააბარა. სამხედრო სკოლის დასრულების შემდეგ ერთ-ერთ დივიზიაში ჩაირიცხა, მაგრამ ტუპერკულოზით მძიმედ დაავადებულმა ოფიცრის კარიერის გაგრძელება ვეღარ შეძლო. გარდაიცვალა 1927 წლის 2 აგვისტოს საფრანგეთის აღმოსავლეთით, ოტვილში. მისი ანდერძის თანახმად, ნეშტი მშობლიური მიწისათვის უნდა მიებარებინათ. მეუღლემ ვერონიკამ ჰარისმა, მიცვალებულის ჩამოსასვენებლად სსრკ საგარეო საქმეთა სახალხო კომისრის გ. ჩიჩერინის დახმარებით სპეციალური ნებართა მიიღო, მაგრამ გემი სახელწოდებით "ჯოტო ემუხვარი" ბათუმში ერთი წლის შემდეგ შემოვიდა. 1928 წლის 12 ივლისს გაზეთ "საბჭოთა აფხაზეთში" გამოქვეყნდა განცხადება ჯოტო ემუხვარის დაკრძალვის შესახებ: "დაკრძალვა გაიმართება ოჩამჩირის რაიონში, ოქუმში, 1928 წლის 16 ივლისს". აფხაზური ემიგრაციის წარმომადგენელი. ვერონიკა ჰარისის (ვერონიკა ევა ქრიუდსონ-ემუხვარის) მეუღლე.

წყარო: აფხაზი არისტოკრატები ემიგრაციაში = Abkhazian aristocracy in exile / ნატო მარშანია.-თბ.,2020.-გვ.290