ზაურ ბერიშვილი

დაბადების ადგილი: ქ. ზუგდიდი.

დაამთავრა თბილისის სახელმწიფო უნივერსიტეტის ფიზიკის ფაკულტეტი 1967 წელს.

1967 წლიდან მუშაობდა თბილისში ახლადდაარსებულ, ნახევარგამტარული ხელსაწყოების ფიზიკის სამეცნიერო კვლევით ინსტიტუტში (ნხფსკი). 1973-1976წწ. იყო უკრაინის მეცნიერებათა აკადემიის ნახევარგამტარების ინსტიტუტის ასპირანტი კიევში, სადაც დაიცვა საკანდიდატო დისერტაცია თემაზე: "კათოდური სამელექტროდიანი გაფრქვევის მეთოდით მიღებული დიელექტრიკული და ნახევარგამტარული ფირების შემუშავება, კვლევა და გამოყენება" (1976). 1976-2004წწ. მუშაობდა სამეცნიერო-საწარმო გაერთიანება "მიონ"-ში თბილისში, რომელიც შეიქმნა ნხფსკი-ს ბაზაზე  და ძირითადად ასრულებდა ყოფილი სსრკ სამხედრო კომპლექსის დაკვეთებს. არის 100-ზე მეტი სამეცნიერო ნაშრომის და მონოგრაფიის ავტორი და თანაავტორი. მათ შორის  ნაწილი გამოქვეყნებულია საერთაშორისო სამეცნიერო ჟურნალებში: "Innovation plannar-rotational magnetron sputtering device modern mono and multicomponent coverings for synthesis" (თანაავტორი, 2025); Innovative magnetron sputtering for the synthesis of catalytic and nanostructured materials and its possible using in biomedicine and in the fight against COVID-19 (თანაავტორი, 2020); Planar Magnetron Sputtering Device: A New Generation of Magnetron Sputtering Design and Technology (თანაავტორი, 2017). აქვს 10-მდე საავტორო უფლება, საქართველოს პატენტი, განაცხადი საერთაშორისო პატენტებზე და ინდოეთის პატენტი. 2002-2005წწ. მონაწილეობდა საერთაშორისო მეცნიერებათა და ტექნოლოგიური ცენტრისა და ნატოს SFP ENABLE AB973796- ის ერთობლივ პროექტში № 801. არის ვეტერანი პირველთანრიგოსანი მთამსვლელი და მოთხილამურე, ცნობილი უშბას ექსპედიციის მონაწილე (1968). აქტიურად არის ჩართული ვაკუუმში ინოვაციური პლანარულ-როტაციული მაგნეტრონული გაფრქვევის მოწყობილობის კონსტრუქციის და შესაბამისი ტექნოლოგიების სრულყოფაში, მის პოპულარიზაციასა და კომერციალიზაციის სფეროში, რამეთუ, ტექნიკური და ტექნოლოგიური მახასიათებლებიდან გამომდინარე, აღნიშნულ მაგნეტრონულ მოწყობილობაზე მოთხოვნა მსოფლიო ბაზარზე დიდია. არის ზუსტ და საბუნებისმეტყველო მეცნიერებათა ფაკულტეტის აკად. ნ. კეკელიძის სახელობის ნივთიერებათა კვლევის სამეცნიერო კვლევის ინსტიტუტის მთავარი მეცნიერი თანამშრომელი, სსიპ ინსტიტუტი "ოპტიკა"-ს უფროსი მეცნიერ-თანამშრომელი და კავკასიის უნივერსიტეტის ასოცირებული პროფესორი.

წყარო: თბილისის სახელმწიფო უნივერსიტეტი: encyclopedia.tsu.ge

• საქართველოს დამსახურებული გამომგონებელი