მიხეილ ბაშელეიშვილი

დაბადების ადგილი: სოფელი ბაში, სამტრედიის რაიონი.

დაამთავრა თბილისის სახელმწიფო უნივერსიტეტი 1980 წელს.

1973 წლიდან იყო ილია ვეკუას სახელობის გამოყენებითი მათემატიკის ინსტიტუტის დრეკადობის თეორიის განყოფილების გამგე, 1982 წლიდან კი საქართველოს ტექნიკური უნივერსიტეტის უმაღლესი მათემატიკის კათედრის პროფესორი. მისი მეცნიერული კვლევის ძირითადი მიმართულებები იყო დრეკადობის მათემატიკური თეორია და მათემატიკური ფიზიკის ინტეგრალური და დიფერენციალური განტოლებების თეორია. იგი თანაავტორია მონოგრაფიისა, რომელიც შეიცავს დრეკადობის თეორიის მათემატიკური საფუძვლების ანალიზს. მონოგრაფიამ დიდი გამოხმაურება ჰპოვა სპეციალისტების წრეში. მისი ნაშრომები აგრეთვე ეძღვნება ფოროდრეკადობის თეორიის ძირითადი სასაზღვრო ამოცანების გამოკვლევას. კერძოდ, ამონახსნის არსებობისა და ერთადერთობის თეორემების დამტკიცებას, როგორც ორგანზომილებიანი, ისე სამგანზომილებიანი ორგვარი ფორების შემცველი სხეულებისათვის. ცხადი სახით აქვს ამოხსნილი ამოცანები კონკრეტული არეებისათვის: ნახევარსივრცის, ნახევარსიბრტყისა და სფეროსათვის. მის მიერ თერმოდრეკადობის თეორიის სტატიკის ორგანზომილებიან განტოლებათა სისტემისათვის აგებულია ფუნდამენტური და სინგულარული ამონახსნები სხეულის მიკროტემპერატურის გათვალისწინებით. მათემატიკოსი და მექანიკოსი, ფიზიკა-მათემატიკის მეცნიერებათა დოქტორი (1967), პროფესორი (1970).

წყარო: საქართველო: ენციკლოპედია: ტ.I.–თბ., 1997.–გვ.379; საქართველოს მათემატიკოსები და მექანიკოსები: ბიოგრაფიული ცნობარი/ნოდარ მახვილაძე. -თბ., 2016. -გვ.185-186; წიგნი ღირსებისა: ტ. 4/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2002. - გვ.279

• ამერიკის მათემატიკური საზოგადოება, ნამდვილი წევრი (1992-)
• საქართველოს მათემატიკური საზოგადოება, წევრი

• 1999 - ღირსების ორდენი
  მოსწავლე და სტუდენტი ახალგაზრდობის აღზრდა-განათლებაში შეტანილი პირადი დიდი წვლილისათვის, მაღალი პროფესიონალიზმისა და ნაყოფიერი სამეცნიერო-პედაგოგოური მოღვაწეობისათვის
• 1988 - საქართველოს მეცნიერებათა დამსახურებული მოღვაწე
• 1987 - ნიკო მუსხელიშვილის სახელობის პრემია
  
• 1971 - საქართველოს სახელმწიფო პრემია