მიხეილ შავიშვილი

დაბადების ადგილი: სოფელი ჭანიეთი, ოზურგეთის რაიონი.

სწავლობდა ბათუმის პედაგოგიურ ინსტიტუტში.

სიმღერასა და ლოტბარის ხელოვნებას ეუფლებოდა ჯერ არტემ ერქომაიშვილთან, შემდეგ ვ. სიმონიშვილთან, 1936-1937წწ. მღეროდა სახელმწიფო ეთნოგრაფიულ გუნდში; სწავლის პერიოდში გახდა აჭარის სიმღერისა და ცეკვის სახელმწიფო ანსამბლის სოლისტი-მოკრიმანჭულე, ანსამბლის ლოტბარი არტემ ერქომაიშვილი იყო; 1957 წელს ოზურგეთის კულტურის სახლთან დააარსა ანსამბლი "შვიდკაცა", ანსამბლთან ერთად კონცერტებს მართავდა სსრკ–ის ქალაქებსა და საზღვარგარეთის ქვეყნებში; "შვიდკაცას" პარალელურად ის ხელმძღვანელობდა სოფელ ქაქუთის გუნდს; მან შეკრიბა და აღადგინა მრავალი ქართული ხალხური სიმღერა; 1974 წლიდან ხელმძღვანელობდა ბავშვთა ანსამბლ "კრიმანჭულს", რომელიც თავად დააარსა; ამან დასაბამი მისცა რაიონებში ბავშვთა ფოლკლორული ანსამბლების შექმნას; იყო გურული ხალხური სიმღერების შემსრულებელი, ლოტბარი.

წყარო: მუსიკის ენციკლოპედიური ლექსიკონი. – თბ., 2007. – გვ. 308; წიგნი ღირსებისა: ტ. 1/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2000. - გვ.284

• 1995 - ღირსების ორდენი
• 1983 - საქართველოს სახალხო არტისტი
• 1961 - საქართველოს დამსახურებული არტისტი