ანტონ დუმბაძე

ქართული საეკლესიო გალობის ერთ-ერთი უბადლო მცოდნე და მასწავლებელი; სამგალობლო ტრადიციების მქონე დუმბაძეების საგვარეულო ოჯახის წარმომადგენელი, მოღვაწეობდა გურიაში შემოქმედის მონასტერში; მასთანაა დაკავშირებული გალობის განსაკუთრებული კილოს შემოღება, შესწავლა, დაცვა და განვითარება; იგი ამ საგვარეულოს ერთ-ერთი მნიშვნელოვანი წარმომადგენელი იყო XIX  საუკუნის დასასრულს საქართველოში; თანამედროვეთა შეფასებით იგი არის "თვით პაპა გურულის გალობისა, აღდგენილი და განმამტკიცებელი მისი მთელს გურია-სამეგრელოში"; ის "სრული მგალობელია", რომლის გარშემოც თავს იყრიან ცნობილი შემსრულებლები: მელქისედეკ ნაკაშიძე, რაჟდენ ხუნდაძე, ნესტორ კონტრიძე, დავით დუმბაძე; მისი საგვარეულოს მიერ დამკვიდრებულ კილოს, შემდგომში დუმბაძის კილო ეწოდა; ცნობილმა მუსიკოსმა, მომღერალმა და ფოლკლორისტმა ფილიმონ ქორიძემ მისგან გურიაში ჩაიწერა, ნოტებზე გადაიტანა და კრებულების სახით გამოსცა ასობით საგალობელი; ესენია: პარტიტურა N1 "ქართული გალობა-ლიტურგია იოანე ოქროპირისა, მღვდლისა და მღვდელ-მთავრისათვის" (ტფილისი, 1895), პარტიტურა N2 "საგალობელნი პირველშეწირულისა ვასილი დიდისა, მღვდლად კურთხევისა და ქორწინებისა"; დიდი ნაწილი მის მიერ გადმოცემული საგალობლებისა დღემდე გამოუქვეყნებელია.

წყარო: საქართველო: ენციკლოპედია: ტ.2. - თბ., 2012. - გვ.507