გრიშა კოსტავა

დაბადების ადგილი: ქ. ქუთაისი.

მუშაობდა ქუთაისის ლ. მესხიშვილის სახელობის დრამატულ თეატრში (1924–1928, 1931–1934, 1955–1956); იყო კ. მარჯანიშვილის სახელობის სახელმწიფო აკადემიური თეატრის მსახიობი(1928–1931, 1935–1945, 1956–1979). წარმატებით ასრულებდა როგორც დრამატულ, ისე სახასიათო როლებს. როლები: იაგო (უ. შექსპირის "ოტელო"), დე სანტოსი (კ. გუცკოვის "ურიელ აკოსტა"), გაიოზი (ლ. ქიაჩელის "ტარიელ გოლუა"), აპრაკუნე, შამილი (ი. ვაკელის "აპრაკუნე ჭიმჭიმელი", "შამილი"), ლომკაცა (პ. კაკაბაძის "კოლმეურნის ქორწინება"), ილარიონი (ნ. დუმბაძის "მე, ბებია, ილიკო და ილარიონი") და სხვა. 1934-1940 წწ. შეთავსებით მუშაობდა თბილისის თოჯინების თეატრში, სადაც დააარსა ჩრდილების თეატრი. იმავდროულად, 1936–1938წწ. ხელმძღვანელობდა ბათუმის პირველ პროფესიულ თოჯინების თეატრს ("ტიკინების თეატრი"). გადაღებულია ფილმებში "ქალიშვილი გაღმიდან" (ჯაშუში), "ნინო" (არჩილი), "ბაში–აჩუკი" (ფარნა), "მაია წყნეთელი" (ამილახვარი), "მე ვიტყვი სიმართლეს" (მოსამართლე, რეჟ. ლ. ხოტივარი, 1957), "მაია წყნეთელი" (ამილახვარი, 1959), "ღიმილის ბიჭები" (მღვდელი, ორივეს რეჟ. რ. ჩხეიძე, 1969) და სხვა. 

წყარო: თბილისი – ენციკლოპედია. – თბ., 2002 – გვ.611; საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge; საქართველო: ენციკლოპედია: ტ.5. -თბ.,2023. -გვ. 186

• 1965 - საქართველოს სახალხო არტისტი