ჯოვანი სკუდიერი

დაბადების ადგილი: ქ. პადუა, იტალია.

დამთავრა ქ. პადუას უმაღლესი საიმპერატორო-სამეფო სასწავლებელი 1831 წელს.

1837 წელს გაემგზავრა რუსეთში, მუშაობდა ქ. ოდესაში; 1846 წელს კავკასიის მეფისნაცვალმა, ვორონცოვმა გადმოიყვანა თბილისში და დანიშნა საქალაქო ხუროთმოძღვრის მოვალეობის შემსრულებლად; 1847 წლიდან იყო მეფისნაცვლის კანცელარიის საკარანტინო ნაწილის არქიტექტორი; სკუდიერი ძირითადად იმ დროს რუსეთის იმპერიაში გავრცელებულ ისტორიულ სტილში მუშაობდა: იტალიური რენესანსი, ბაროკო, რუსული კლასიციზმი; მისი პროექტით აშენდა ყოფილი ვორონცოვის(იგივე მიხეილის, შემდეგ მშრალი ხიდი) ხიდი, ქარვასლის შენობა(მაშინდელი ერევნის, შემდეგ თავისუფლების მოედანი), "სამხედრო ტაძარი"(მდებარეობდა რუსთაველის გამზირზე, ქაშვეთის ეკლესიის მოპირდაპირე მხარეს, საქართველოს გასაბჭოების დროს ააფეთქეს); სკუდიერის პროექტით თბილისში აშენდა და 1851 წლის 9 ნოემბერს გაიხსნა ოპერის თეატრი - პირველი ოპერის თეატრი საქართველოსა და მთლიანად ამიერკავკასიაში, შენობა მონუმენტური მასშტაბის, შესრულებული იტალიური რენესანსის სტილში, იმ დროინდელ თბილისში ერთ–ერთ საუკეთესო ნაგებობას წარმოადგენდა; საპრემიერო სპექტაკლი იყო იტალიელი კომპოზიტორის, გაეტანო დონიცეტის ოპერა"ლუჩია დი ლამერმური"; რუსეთში მას მოიხსენიებდნენ ივან ბორისოვიჩის სახელით; სკუდიერი დაიღუპა ხარაჩოზე თბილისში, სამხედრო ტაძრის მშენებლობის დროს.

წყარო: ქართული მუსიკის ენციკლოპედიური ლექსიკონი. – თბ., 2015. – გვ. 434