გიორგი ქავთარაძე

დაბადების ადგილი: ქ. თბილისი.

დაამთავრა პეტერბურგის ტოპოგრაფიული (გეოდეზიური) სასწავლებელი 1883 წელს.

1883 წლიდან მუშაობდა კავკასიის სამხედრო ოლქის ტოპოგრაფიულ განყოფილებაში ტოპოგრაფიული აგეგმვების მწარმოებლის თანამდებობაზე; 1883-1900წწ. კავკასიონის ჩრდილოეთ ფერდობზე სტავროპოლსა და დაღესტანს შორის სხვადასხვა მასშტაბებში აწარმოებდა ტოპოგრაფიულ აგეგმვებს. მუშაობდა აგრეთვე ყირიმში - ქ. ევპატორიის მიდამოებში, ასევე კავკასიონის სამხრეთ ფერდობზე მამისონის გადასასვლელსა და მთა ღვანდრას მერიდიანებს შორის და სხვ. 1901-1902წწ. გეოდეზიურ სამუშოებს აწარმოებდა ყარსიის ოლქში და მდ. თერგის დელტაზე; 1903-1918წწ. მისი ხელმძღვანელობით აიგეგმა ყუბანის ოლქის ტერიტორია, შავი ზღვის სანაპირო, სპარსეთისა და თურქეთის მოსაზღვრე რაიონები; 1918-1921წწ. მსახურობდა ქართულ ჯარში, სამხედრო სამინისტროს განსაკუთრებული განყოფილების უფროსად და სამხედრო სამინისტროს კანცელარიის უფროსად. 1919-1941წწ. მუშაობდა თბილისის სახელმწიფო უნივერსიტეტში; 1924-1932წწ. - საქართველოს კარტოგრაფიულ ინსტიტუტში. მას დიდი წვლილი მიუძღვის საქართველოს ალპინიზმის დაფუძნებაში. 1891 წლის 27 ივლისს ავიდა ცენტრალური კავკასიონის მწვერვალ უილთაფაზე (4649მ.).  ჯარში მსახურობდა 1880 წლიდან. 1903 წლიდან მსახურობდა კავკასიის სამხედრო ოლქის შტაბის სამხედრო-ტოპოგრაფიული განყოფილების, გეოდეზიურ სამუშაოთა მწარმოებლად, ქვეგანყოფილების უფროსად. მონაწილეობდა 1914-1918 წლების პირველ მსოფლიო ომში. 1917 წელს მიენიჭა პოლკოვნიკის სამხედრო წოდება - ბრწყინვალე სამსახურისათვის და შრომებისათვის, გაწეული სამხედრო მდგომარეობის დროს.  იყო საქართველოს გეოგრაფიული საზოგადოების ერთ-ერთი დამაარსებელი. პირველი ქართველი მთამსვლელი, ქართველთაგან პირველმა ჩაატარა კავკასიონის ზოგიერთი მწვერვალისა და მყინვარის ტოპოგრაფიული აგეგმვა. ტოპოგრაფ-გეოდეზისტი, მთამსვლელი.

წყარო: ქართული საბჭოთა ენციკლოპედია: ტ.10-თბ., 1986.-გვ.441-442; სამხედრო ფიცის ერთგულნი: ქართველი გენერლები.-თბ., 2015.-გვ.35; ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.254-255

• 1904 - წმინდა ვლადიმირის IV ხარისხის ორდენი
• 1898 - წმინდა ანას II ხარისხის ორდენი
• 1895 - წმინდა სტანისლავის II ხარისხის ორდენი