ნოშრევან ჯიშკარიანი

დაბადების ადგილი: სოფელი ნაგვაზაო, მარტვილის რაიონი.

დაამთავრა თბილისის სახელმწიფო უნივერსიტეტის აღმოსავლეთმცოდნეობის ფაკულტეტი სპარსული ენისა და ლიტერატურის სპეციალობით 1975 წელს; 1975-1977წწ. სწავლობდა შოთა რუსთაველის სახელობის ძველი ქართული ლიტერატურის ინსტიტუტის ასპირანტურაში.

1975 წლიდან ეწეოდა სამეცნიერო-კვლევით და პედაგოგიურ მოღვაწეობას თბილისის სახელმწიფო უნივერსიტეტსა და სხვა უმაღლეს სასწავლებლებში. გამოქვეყნებული აქვს მრავალი ნაშრომი მეცნიერებათა აკადემიის, სახელმწიფო უნივერსიტეტის სამეცნიერო-ბეჭვდით ორგანოებში ("მაცნე", "მოამბე", "ლიტერატურათმცოდნეობა") და პერიოდულ პრესაში, ძველი ქართული, სპარსული და სპარსულენოვანი აზერბაიჯანული ლიტერატურის საკითხებზე; ქართულად თარგმნილი აქვს ჯალალედინ რუმის, რუდაქის, ხაკანის, აბუ საიდისა და ბაბა თაჰერის პოეტური ნაწარმოებები. წერდა ლექსებს სასკოლო ასაკიდან. იყო შოთა რუსთაველის ქართული ლიტერატურის ინსტიტუტის მეცნიერ-თანამშრომელი, ფილოლოგიის მეცნიერებათა კანდიდატი. მისი მშობლიური სკოლა სოფელ ნაგვაზაოში ნოშრევან ჯიშკარიანის სახელს ატარებს.

საკანდიდატო დისერტაციის თემა - "XII საუკუნის ქართული და სპარსულენოვანი აზერბაიჯანული სახოტბო პოეზია". დაიცვა 1982 წელს.

წყარო: ქართველი პოეტები : ენციკლოპედია / შეადგინა ალექსანდრე ელერდაშვილმა.- თბ.,2021.-გვ. 416

• თიხასავით სული ვძერწე : ლექსები (ავტორი). - თბილისი, ინტელექტი, 1999. - 84გვ. . - ISBN: 99928-55-34-7