თეოდორე III (საქართველოს კათოლიკოს-პატრიარქი)

საქართველოს კათოლიკოს-პატრიარქი, დაახლოებით 1429–1435 წლებში, ალექსანდრე I დიდის პირადი მოძღვარი. კათოლიკოსად მოიხსენიებს ალექსანდრე I 1429, 1431, 1433 და 1434 წლებში სვეტიცხოვლისათვის გაცემულ შეწირულების წიგნებში. 1431 წელს ალექსანდრე I-მა "აგარეანთაგან მიტაცებული" ლორე აიღო. ბრძოლის წინ პატრიარქს ქართველი მეომრები დაულოცავს: "...აწ იბრძოლეთ ძლიერად, და დაღათუ ვინმე ომსა შიგან აღსასრული მიიღოთ, ქრისტესთვის წამებულთა გუერდს მიითუალვით". თეოდორე III აქტიურად მონაწილეობდა თემურლენგის შემოსევების შედეგად გაპარტახებული ქვეყნის ეკონომიკის აღდგენაში: ყიდულობდა ნასოფლარებს, გადამწვარ ადგილებს და ასახლებდა გლეხებს. მის დროს ალექსანდრე დიდმა დაამთავრა სვეტიცხოვლის აღდგენა და განუახლა ძველი შეწირულობანი, შესწირა ვირშის მონასტერი სოფლებითურთ. ამ დროს მცხეთის საპატრიარქოს შეუერთდა აგრეთვე არმაზის ციხე ეკლესიით და სოფლებით, ჯვრის მონასტერი სოფლებიანად და სხვ.

წყარო: georgianencyclopedia.ge; საქართველო: ენციკლოპედია: ტ. IV. -თბ., 2018. -გვ.40