სერგი ცხაკაია

დაბადების ადგილი: სოფელი კოკი, ზუგდიდის რაიონი. 

დაამთავრა პეტერბურგის სამხარეო-ტოპოგრაფიული სასწავლებელი 1904 წელს.

1904-1913წწ. ჩაატარა ტოპოგრაფიული სამუშაოები პოლონეთში, მანჯურიასა და კავკასიაში; 1913-1914წწ. მონაწილეობდა თურქეთ-საპარსეთის საზღვრების დამდგენ ინგლის-რუსეთის საერთაშორისო კომისიაში; ტოპოგრაფიულ სამუშაოებს ეწეოდა მდ. არაქსის, ჭოროხის და ევფრატის სათავეებში; 1917 წელს მუშაობა დაიწყო საქართველოს ტოპოგრაფიულ განყოფილებაში ტრიანგულიატორად; 1919 წლიდან ამ განყოფილების ხელმძღვანელია. შეთავსებით მუშაობდა თბილისის სახელმწიფო უნივერსიტეტში, კარტოგრაფიის ინსტიტუტსა და გეოგრაფიის ინსტიტუტში. მისი მონაწილეობით შედგა და გამოიცა მრავალი ზოგადგეოგრაფიული, თემატური რუკები და ატლასი. მათ შორის აღსანიშნავია, 1:200000 მასშტაბის საქართველოს 12 ფურცლიანი რუკა. ეს იყო იმ დროისათვის სსრ კავშირში შედგენილი ერთადერთი ეროვნული რუკა, რომელიც საერთაშორისო სტანდარტებს პასუხობდა; 1929 წელს დაინიშნა ამიერკავკასიის გეოდეზიის სამმართველოს კარტოგრაფიული განყოფილების ხელმძღვანელად; 1932 წელს ამიერკავკასიის კარტოგრაფიული ტრესტის ტექნიკური დირექტორია, ხოლო 1936 წელს ამიერკავკასიის ტოპოგრაფიული ტექნიკუმის სამეცნიერო ხელმძღვანელი; 1934 წლიდან იყო თბილსიის სახელმწიფო უნივერსიტეტის ფიზიკური გეოგრაფიის კათედრის დოცენტი, ხოლო 1936 წლიდან - ტოპოგრაფია-კარტოგრაფიის კათედრის გამგე. ლექციებს კითხულობდა გორის, სოხუმის, ქუთაისის, ზუგდიდის და ცხინვალის პედაგოგიურ ისტიტუტებსა და სასწავლებლებში. იყო აგრეთვე ვახუშტი ბაგრატიონის სახელობის გეოგრაფიის ინსტიტუტის კარტოგრაფიული განყოფილების გამგე. მას გამოკვლეული აქვს საქართველოსა და კავკასიის გეოდეზიური და კარტოგრაფიული შესწავლილობის ისტორია. შექმნა რამდენიმე სახელმძღვანელო უმაღლესი სასწავლებლისათვის. გეოგრაფიულ მეცნიერებათა კანდიდატი, დოცენტი (1950). თანამედროვე ქართული კარტოგრაფიის ფუძემდებელი.

საკანდიდატო დისერტაციის თემა - "რუკათმცოდნეობა ტოპოგრაფიის საფუძვლებით", დაიცვა 1947 წელს.

წყარო: ქართული საბჭოთა ენციკლოპედია: ტ. 11.-თბ., 1987.-გვ.247; ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.289-290

• კარტოგრაფია : ზოგადი კარტოგრაფიის კურსის სახელმძღვ. (ავტორი). - თბილისი, თბილ. უნ-ტის გამ-ბა , 1962. - 332გვ.
• გეოდეზიის სახელმძღვანელო (ავტორი). - თბილისი, სტალინის სახ. თბილისის სახელმწ. უნ-ტის გამ-ბა და სტ., 1951. - 386გვ.
• რუკათმცოდნეობა ტოპოგრაფიის საფუძვლებით : მოკლე კურსი : უმაღლესი პედაგოგიური სასწავლებლებისათვის (ავტორი). - თბილისი, სამეცნ.-მეთოდ. კაბინეტის გამ-ბა, 1946. - 288გვ.