ოთარ ბეციაშვილი

დაბადების ადგილი: ქ. გურჯაანი.

დაამთავრა თბილისის I საფერშლო სკოლა 1943 წელს.

თორმეტი წლის ასაკიდან თბილისში გადავიდა და სწავლა შრომის მეოთხე სკოლაში განაგრძო, სადაც სიმღერას დავით ჭკუასელი ასწავლიდა; სასკოლო გუნდის ერთ-ერთი აქტიური წევრი იყო; სამამულო ომის წლებში მუშაობა დაიწყო ფერშლად გურჯაანის ევაკოპუნქტში; მღეროდა პლეხანოვის სახელობის კლუბში(გუნდს გიორგი ბიღაძე ხელმძღვანელობდა); იმ დროს მრავალი კონცერტი გამართეს დაჭრილებისთვის; შემდეგ, ევაკოჰოსპიტალში დაჭრილებისა და მომსახურე პერსონალისაგან გუნდი ჩამოაყალიბა და ბევრი კონცერტი გამართა; 1946-1950წწ. იყო კაჭრეთის სარაიონო გუნდის გამგე, განაგებდა კაჭრეთისა და ჯიმითის საშუალო სკოლების გუნდებს; კვალიფიკაციის ასამაღლებლად თბილისს რამდენჯერმე ეწვია და ხალხური შემოქმედების სახლში სადირიჟორო კურსები გაიარა; აქ ისწავლა მუსიკის ანბანი, ჩონგურსა და ფანდურზე დაკვრა; 1950 წლიდან მუშაობა დაიწყო გურჯაანის საშუალო სკოლაში, აგრეთვე შექმნა გუნდები სარაიონო კულტურის სახლში და სოფელ გურჯაანის სასოფლო კლუბში; ხელმძღვანელობდა გუნდებს საკონსერვო ქარხანაში და კალაურის, მუკუზნის ველისციხის, ჩუმლაყის და სხვა კოლმეურნეობებში, იმუშავა სკოლებში, აგრეთვე გურჯაანის ღვინის ქარხნის, მუკუზნისა და კარდანახის საბჭოთა მეურნეობების გუნდებში; შექმნა აგიტმხატვრული ბრიგადები და მრავალი კონცერტი გამართა როგორც თვით გურჯაანში, ასევე მეზობელ რაიონებში; 1961 წლის მაისში საბჭოთა საქართველოს 40 წლისთავის გამო გამართულ ზეიმზე მისი გუნდიც მიიწვიეს; ლოტბარი.

წყარო: ხალხური სიმღერის მოამაგენი.-თბ., 2007.-გვ. 61