იოსებ გერგაული

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1956 წელს.

1957-1959წწ. განაწილებით მუშაობდა გორლოვკის (დონბასი) ბინათმშენებლობის ტრესტში სამუშაოთა მწარმოებლად, საწარმოო-ტექნიკური განყოფილების უფროსად, სამშენებლო სამმართველოს უფროსად; 1959 წლიდან იყო საქართველოს მშენებლობის სამინისტროს N9  სამშენებლო ტრესტის საწარმოო-ტექნიკური განყოფილების, სამშენებლო სამმართველოს, მოძრავ-მექანიზებული კოლონის უფროსი, ტრესტის მთავარი ინჟინერი და მმართველი; მისი უშუალო ხელმძღვანელობით აშენდა და საექსპლუატაციოდ გადაიცა სამრეწველო და სამოქალაქო დანიშნულების ობიექტები (გორში, შიდა ქართლისა და მესხეთ-ჯავახეთის რაიონებში): კასპის ცემენტის ქარხნის სიმძლავრეები, ქარხანა "კასპელექტროაპარატი", წისქვილკომბინატი, მაცივარკომბინატი და გორის სახლსაშენი კომბინატი, ხაშურის მინის ტარის ქარხანა, რძის კომბინატი, სასტუმრო "თბილისი", კომპოზიტორთა შემოქმედებითი სახლი და სანატორიუმი "მთის ხეობა" (ბორჯომში), სპორტულ-გამაჯანსაღებელი ნაგებობები (ბაკურიანში), მსუბუქი მრეწველობის ობიექტი (ახალციხეში).

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.133