ჭიჭიკო გელეიშვილი

დაბადების ადგილი: ქ. სამტრედია.

ბათუმის ორკლასიანი სასწავლებლის დამთავრების შემდეგ, 1904 წელს, სწავლა განაგრძო ჯერ ბათუმის ვაჟთა გიმნაზიაში, მომდევნო წლებში კი, თბილისის პირველ გიმნაზიასა და კომერიცულ სასწავლებელში, რომელიც 1914 წელს დაამთავრა; 1915-1916წწ. სწავლობდა კიევის კომერციულ ინსტიტუტში, რომელიც არ დაუმთავრებია.

თეატრალური მოღვაწეობა დაიწყო 1907 წელს ავჭალის აუდიტორიის მუშათა დრამატულ წრეში მოკარნახედ; 1911-1916წწ. იყო რეჟისორის თანაშემწე პლეხანოვის კლუბში; 1917-1920წწ. იმავე თანამდებობაზეა თბილისის სახალხო თეატრში; 1921-1922წწ. თბილისის წითელი არმიის თეატრში მუშაობდა და ამ თეატრის დაარსების ერთ-ერთი აქტიური მონაწილე იყო; 1924-1926წწ. მუშაობდა ქუთაისის თეატრში ტექნიკურ რეჟისორად და დამდგმელ რეჟისორად; ვ. ნინიძესთან ერთად იყო ერთ-ერთი ინიციატორი თბილისის სანიტარული კულტურის თეატრის დაარსებისა, სადაც იმუშავა რეჟისორად 1927-1929 წლებში; 1930-1940წწ. კ. მარჯანიშვილის თეატრში მოღვაწეობდა რეჟისორად, იყო სარეჟისორო კოლეგიის მდივანი; 1940-1941წწ. თბილისის ოპერისა და ბალეტის თეატრში იყო რეჟისორის ასისტენტი; 1942-1943წწ. ისევ სანკულტურის თეატრის რეჟისორი; 1944-1948წწ. კ. მარჯანიშვილის სახელმწიფო თეატრის რეჟისორის ასისტენტი და დასის გამგე; 1949-1950წწ. ძერჟინსკის სახელობის კლუბში სხვადასხვა წრეების ხელმძღვანელი. მან მრავალი ნაწარმოები გაასცენიურა: "სიმონა", "გოგია უიშვილი" (ე. ნინოშვილის მიხედვით), "მამლუქი" (უიარაღოს მიხედვით), "სამანიშვილის დედინაცვალი", "სოლომონ მორბელაძე" (დ. კლდიაშვილის მიხედვით). ავტორია ორიგინალური პიესებისა: "ცეცხლოვანი ყვავილი", "მშვიდობის ლელო". დაწერა ლიბრეტო ოპერებისათვის: "ბაში-აჩუკი" (კომპოზიტორი ა. კერესელიძე), "ხევისბერი გოჩა" (კომპოზიტორი შ. აზმაიფარაშვილი), "ელეონორა" (კომპოზიტორი ვ. კურდიტი), "ბეკინას ქორწინება" (კომპოზიტორი კ. მეღვინეთუხუცესი).

წყარო: საიუბილეო თარიღები: თეატრი, მუსიკა, კინო.- თბ., 1991. -გვ.11

• სოლომონ მორბელაძე : კომედია 2 მოქმედებად და 4 სურათად დ. კლდიაშვილის მოთხრობების მიხედვით (ავტორი). - თბილისი, საქართველოს სსრ ხალხური შემოქმედების ცენტრალური სახლი, 1941. - 22გვ.