ალექსანდრე მახარაძე

კრიმანჭულის ერთ-ერთი თვალსაჩინო შემსრულებელი იყო; წარმატებით გამოდიოდა სამუელ ჩავლეიშვილის ანსამბლთან ერთად; არაერთხელ უმღერია საჯარო კონცერტებში; მის შესრულებას თვითმყოფადობა ახასიათებდა; საუკუნის დასწყისში ფოთში გადასახლდა, სადაც თითქმის ოცი წელი იმუშავა არტელში რკინიგზის სადგურის მტვირთავ მუშად; იქვე, ფოთში ქმნიდა მომღერალთა პატარა ჯგუფებს და დროდადრო კონცერტებს მართავდა; პარალელურად სოხუმშიც ჩადიოდა და ძუკუ ლოლუას და მის ანსამბლს ხელს უწყობდა გურული სიმღერების უკეთ შეთვისებაში; 1912-1913წწ. იყო ფოთში ავქსენტი მეგრელიძის ხელმძღვანელობით არსებული ანსამბლის სოლისტი და ხელმძღვანელს ეხმარებოდა ხალხური სიმღერების სწორად შესრულებაში; შემდეგ ისევ რკინიგზაში განაგრძო მუშაობა მეარტელედ; აქ მომღერალთა პატარა ჯგუფებს უძღვებოდა, ხოლო შემდეგ ჯერ რკინიგზის ანსამბლს უძღვებოდა, შემდეგ კი, სიცოცხლის ბოლო ორი წლის განმავლობაში, საქკოოპკავშირის არტელ "რეკორდთან" ჩამოყალიბებულ გურულ მომღერალთა გუნდს ხელმძღვანელობდა; მისი მონდომებული მუშაობის შედეგად, ფოთსა და თბილისში გურულ მომღერალთა გუნდების მრავალი ხელმძღვანელ-ლოტბარი გამოვლინდა, რომლებმაც განაგრძეს დიდი სახალხო საქმე; 1927 წელს მოსკოვში გამართულ ქართულ საღამოებში მონაწილეობის მისაღებად ალექსანდრე მახარაძე ვარლამ სიმონიშვილმა წაიყვანა; ქართული ხალხური სიმღერის ამაგდარმა მოღვაწემ წარუშლელი შთაბეჭდილება მოახდინა მსმენელზე; ითვლებოდა სიმღერა "ჰა დილას" ერთ-ერთ საუკეთესო შემსრულებლად; ლოტბარი.

წყარო: ხალხური სიმღერის მოამაგენი.-თბ., 2007.-გვ. 148