ნინო გამრეკელი-თორელი

დაბადების ადგილი ქ. ქუთაისი.

დაწყებითი განათლება მიიღო ოჯახში, შემდეგ კი სწავლა განაგრძო ქუთაისის ქალთა გიმნაზიაში. 1898 წელს გამრეკელების ოჯახი საცხოვრებლად გადავიდა ბაქოში და იქ გააგრძელა განათლების მიღება.

1900 წელს მან პირველად მიიღო მონაწილეობა ბაქოს სცენისმოყვარეთა წარმოდგენაში. ამის შემდეგ იგი ხშირად მონაწილეობდა სხვადასხვა სპექტაკლში. 1904 წელს სწავლა გააგრძელა მოსკოვში მსახიობ პოლონსკაიას დრამატულ კურსებზე. აქ მან ითამაშა ა. ოსტოვსკის კომედიაში "ბალზამინოვის ქორწინება", სადაც შეასრულა ხიმკას როლი. 1905 წელს  ნინო გამრეკელი დაბრუნდა ბაქოში და მუშაობა დაიწყო ბაქოს ქართულ  დრამატულ წრეში მსახიობად, შემდეგ კი რეჟისორად. 1910 წელს ჩამოდის თბილისში და მუშაობას იწყებს ზუბალაშვილის სახალხო სახლთან არსებულ დრამწრეში მსახიობად. 1911 წელს მიწვეულ იქნა მსახიობად და რეჟისორად ქუთაისის თეატრში. 1915 წელს კვლავ მოსკოვს გაემგზავრა და რამდენიმე წელი მუშაობდა მსახიობად.  1920-1921 წწ. სეზონში  ნ. გამრეკელი თბილისის დრამატული თეატრის მსახიობია. 1924 წელს მუშაობდა  მსახიობად და რეჟისორად ბათუმში, ქუთაისში, ჭიათურაში. უმთავრესად დრამატული ხასიათის მსახიობი იყო. განსაკუთრებით აღსანიშნავია მის მიერ შესრულებული პატარა კახის როლი აკ. წერეთლის ისტორიულ დრამაში  "პატარა კახი." ნინო გამრეკელი პირველი ქალია, რომელმაც დაიწყო მოღვაწეობა საერეჟისორო ასპარეზე.

წყარო: ხელოვნების კალენდარი : თეატრი, მუსიკა, კინო.-თბ., 1992.-გვ.16-17; საქართველო: ენციკლოპედია: ტ.I.–თბ., 1997.–გვ.542