ალექსანდრე ვინოგრადოვი

დაბადების ადგილი: სოფელი მალოსრედნი, სმოლენსკის ოლქი.

დაამთავრა თბილისის რკინიგზის ტრანსპორტის ინჟინერთა ინსტიტუტის ხიდებისა და გვირაბების მშენებლობის ფაკულტეტი 1951 წელს.

1951-1955წწ. მუშაობდა სსრკ სატრანსპორტო მშენებლობის სახელმწიფო საპროექტო ინსტიტუტ "კავკასტრანსმშენპროექტში" ინჟინრად, უფროს ინჟინრად; 1955-1960წწ. ჯგუფის ხელმძღვანელად; 1960-1963წწ. მივლინებით იმყოფებოდა აფრიკისა და აზიის ქვეყვებში; 1963-1972წწ. იყო საქართველოს კომპარტიის ცენტრალური კომიტეტის, მშენებლობისა და საქალაქო მეურნეობის განყოფილების ინსტრუქტორი; 1972 წლიდან განყოფილების გამგის მოადგილე; კურირებდა სახელმწიფო საპროექტო ინსტიტუტ "კავკასტრანსმშენპროექტის" ("კავგიპროტრანსი"), სამშენებლო ორგანიზაცია "თბილმეტრომშენს", მნიშვნელოვანი სამრეწველო და სამოქალაქო დანიშნულების ობიექტების - "ენგურჰესის", "გაგრა-ხოსტის" საავტომობილო ტრასის, თბილისის მეტროპოლიტენის მეტროსადგურების - "მარჯანიშვილი", "რუსთაველი", საშენ მასალათა მრეწველობის მსხვილი ობიექტების მშენებლობას; დაჯილდოებულია მედლებით და საქართველოს სსრ უმაღლესი საბჭოს პრეზიდიუმის საპატიო სიგელით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.228

• საპატიო ნიშნის ორდენი
• საქართველოს დამსახურებული ინჟინერი