გივი კვარაცხელია

დაბადების ადგილი: ქ. წალენჯიხა.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1958 წელს.

1958-1964წწ. მუშაობდა საქართველოს მშენებლობის სამინისტროს N7 სამშენებლო ტრესტ "საქშახტმშენის" N3 სამშენებლო სამმართველოში მშენებელ ოსტატად, სამუშაოთა მწარმოებლად, უბნის უფროსად; 1964-1970წწ. ხელმძღვანელობდა საქართველოს მშენებლობის სამინისტროს სამშენებლო ტრესტ "ბიჭვინთმშენის" N1 სამშენებლო სამმართველოს; 1970-1973წწ. მშენებლობის სამინისტროს რუსთავის სახლსაშენ კომბინატს; 1973-1977წწ. იყო საქართველოს მომხმარებელთა ცენტრალური კავშირის (ცეკავშირის) სამშენებლო ტრესტ "კოოპმშენის" მმართველის მოადგილე, საშენ მასალათა წარმოების სამმართველო "კოოპმშენის" უფროსი; 1977-1983წწ. საქართველოს სოფლის მეურნეობის სამინისტროს მშენებარე ობიექტების გაერთიანებული დირექციის ქართლის ზონალური სამმართველოს უფროსი; 1983-1984წწ. იყო საქართველოს მშენებლობის სამინისტროს N12 სამშენებლო ტრესტის მთავარი ინჟინერი; 1984-1988წწ. საქართველოს მოსახლეობის საყოფაცხოვრებო მომსახურების სამინისტროს კაპიტალური მშენებლობისა და საყოფაცხოვრებო მომსახურების გაერთიანებული სამმართველოს უფროსი; 1988-1998წწ. კოოპერატივ "მშენებელი 88"-ისა და 1998-2007წწ. შპს "რაჭა-98"-ის დირექტორი; 2007 წლიდან ხელმძღვანელობს შპს "აი-სი-ეს"-ის ტექნიკურ განყოფილებას; დიდი წვლილი აქვს შეტანილი ბიჭვინთის მაღლივი პანსიონატების საერთაშორისო მნიშვნელობის საკურორტო კომპლექსისა და აფხაზეთის ავტონომიური რესპუბლიკის სხვადასხვა საზოგადოებრივი დანიშნულების ობიექტების მშენებლობაში; ასევე, მთელი რიგი საქალაქო, სამრეწველო, საზოგადოებრივი, სასოფლო-სამეურნეო და საყოფაცხოვრებო დანიშნულების ობიექტების მშენებლობაში საქართველოს მასშტაბით; მიღებული აქვს სახელმწიფო ჯილდოები.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.290-291