ვახტანგ სულაქველიძე

დაბადების ადგილი: ქ. ქუთაისი.

1938-1939 წლებში კ. მარჯანიშვილის სახელობის თეატრთან არსებულ სტუდიაში სწავლობდა. 1942 წელს დაამთავრა შოთა რუსთაველის სახელობის სახელმწიფო თეატრალური ინსტიტუტი და იმავე წელს მარჯანიშვილის თეატრში მიიწვიეს მსახიობად.

1945 წელს კი შოთა რუსთაველის სახ. თეატრში მოღვაწეობდა. 1947 წელს მას იწვევენ სამუშაოდ  თბილისის პიონერთა და მოსწავლეთა სასახლეში რეჟისორად და პედაგოგად. აქ დადგმული სპექტაკლებიდან აღსანიშნავია: ნ. ნაკაშიძის "კოტეს დანაშაული", გ. შატბერაშვილის "იავნანამ რა ჰქმნა?" (ი. გოგებაშვილის მიხედვით), ს. მიხალკოვის "წითელი ყელსახვევი", და "შინ დაბრუნება მინდა", ა. ბრუნშტეინის "ცისფერი და ვარდისფერი". ვ. სულაქველიძე სახასიათო როლების შესანიშნავი შემსრულებელი მსახიობი იყო. მისი სცენური სახეებიდან აღსანიშნავია: არტემ ივანიჩი (ავქ. ცაგარელის "რაც გინახავს, ვეღარ ნახავ"), გრუმიო (უ. შექსპირის "ჭირვეული ცოლის მორჯულება"), პეტრე ურცხვაძე (ლ. არდაზიანის "სოლომონ ისაკიჩ მეჯღუანაშვილი"), კორნელი კვინტრაძე (ვ. კანდელაკის "სარეველა"), არქიპო (ი. ვაკელის "საქმიანი კაცი"), ფეოდოროვი (მ. მრევლიშვილის "ნიკოლოზ ბარათაშვილი"), კირილე (ირ. ჭავჭანიძის "თბილისელი ქალიშვილები"), პოლაზოვი (ვ. მალიარევსკის "ქარიშხლის წინ"), დიტო (ვ. როზოვი "ხალისიანი მეგობრები"), პანტალონე (კ. გოლდონის "ორი ბატონის მსახური"), არსენიო (ჯ. ფლეჩერის "ესპანელი მღვდელი") და სხვა. ვ. სულაქველიძემ ქართულ კინოშიც შეიტანა თავისი წვლილი: მუსიკოსი ("თოჯინები იცინიან"), ორკესტრის ხელმძღვანელი ("მე, ბებია, ილიკო და ილარიონი") და სხვა. განსაკუთრებული  წარმატება ხვდა წილად მის აბესალომს ირ. კვირიკაძის ფილმში "ქვევრი".

წყარო: ხელოვნების კალენდარი კინო, მუსიკა, თეატრი. -თბ., 1992.- გვ.55-56; ეროვნული ფილმოგრაფიის პორტალი: geocinema.ge; 2007 წლის საიუბილეო თარიღები: თეატრი, მუსიკა, კინო, ქორეოგრაფია.- თბ., 2007.- გვ.44

• 1961 - საქართველოს ხელოვნების დამსახურებული მოღვაწე