ბოჩია გაბესკირია

დაბადების ადგილი: დაბა ახალსენაკი.

დაამთავრა თბილისის სახელმწიფო უნივერსიტეტის ფილოლოგიური ფაკულტეტი 1932 წელს.

იგი სხვადასხვა დროს მუშაობდა  განათლების სახალხო კომისარიატის ხელოვნების განყოფილებაში სათეატრო დარგის ინსპექტორად (1930-1935), გაზეთ "საბჭოთა ხელოვნებაში" ლიტმუშაკად (1926-1937), ხალხური შემოქმედების სახლში, ჯერ სარეპერტუარო განყოფილების გამგედ, შემდეგ დირექტორის მოადგილედ (1937-1942), ხელოვნების საქმეთა სამმართველოს სათეატრო განყოფილების უფროს  სპეციალისტად (1943-1945), აფხაზეთის ასსრ ხელოვნების საქმეთა სამმართველოს უფროსის მოადგილედ (1945-1947), თბილისის სახელმწიფო სიმფონიური ორკესტრის დირექტორად (1948-1949), აფხაზეთის ასსრ ფილარმონიის დირექტორად და სამხატვრო ხელმძღვანელად (1949-1954). 1954 წელს დაინიშნა სოხუმის თეატრის დირექტორად. 1972 წელს გადმოიყვანეს თბილისში გრიბოედოვის თეატრის დირექტორად. დაწერილი აქვს პიესა "სამი მეგობარი", რომელიც დაიდგა სოხუმის თეატრში, თარგმნა დრამატული ნაწარმოებები: ა. ბარიანოვის "იმათ მხარეში",  ბრონშტეინის "ცოცხლების დღეა", კ. სიმიონოვის "უცხო ჩრდილი" და სხვა. მისი ნათარგმნი პიესები იდგმებოდა საქართველოს სხვადასხვა თეატრში. წერდა რეცენზიებსა და სტატიებს, კითხულობდა ლექციებს ლიტერატურისა და ხელოვნების საკითხებზე.

წყარო: ხელოვნების კალენდარი თეატრი, მუსიკა, კინო -თბ., 1992. - გვ.66

• 1958 - საქართველოს ხელოვნების დამსახურებული მოღვაწე
• 1954 - აფხაზეთის ასსრ ხელოვნების დამსახურებული მოღვაწე