მურთაზ ფოჩხუა

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1956 წელს.

1957-1964წწ. მუშაობდა საპროექტო ინსტიტუტ "თბილქალაქპროექტში" და "საქმრეწვტყეპროექტში" ინჟინრად, უფროს ინჟინრად, ჯგუფის ხელმძღვანელად, მთავარ სპეციალისტად; 1964-1966წწ. იყო საქართველოს მშენებლობის საქმეთა სახელმწიფო კომიტეტის "საქსახმშენის" მთავარი სპეციალისტი; 1966-1972წწ. საქართველოს სასოფლო მშენებლობის სამინისტროს სპეცკოლონის მთავარი ინჟინერი, კოლონის უფროსი, მთავარი სამმართველოს მთავარი ინჟინერი; 1973-1979წწ. იყო საქართველოს კპ ცენტრალური კომიტეტის ინსტრუქტორი; 1980-1989წწ. საქართველოს მინისტრთა საბჭოს განყოფილების გამგის მოადგილე, საქართველოს სატყეო მრეწველობისა და საშენი მასალების მრეწველობის მინისტრების მოადგილე; 1990-1991წწ. ავჭალის საკედლე მასალების კომბინატის დირექტორი; საქმიანობის სხვადასხვა ეტაპზე, მისი მონაწილეობით დაპროექტდა თბილისის სპორტის სასახლე, თბილისის ცენტრალური გაზგამანაწილებელი სადგური და მისგან გამავალი მაგისტრალური ქსელები, დამუშავდა თბილისის გაზიფიცირების პროექტი; ხელმძღვანელობდა საქართველოს მეცხოველეობისა და მეფრინველეობის ობიექტების მშენებლობას; უშუალოდ კურირებდა სატყეო, ხის დამამუშავებელი და საშენი მასალების საწარმოო ობიექტების მშენებლობა-რეკონსტრუირებას, კასპისა და რუსთავის ცემენტის ქარხნების რეკონსტრუქციას, აგურის ახალი ქარხნის მშენებლობას მეტეხში, თანამედროვე უცხოური ტექნოლოგიების ათვისებას და სხვა.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.550

• საქართველოს სახელმწიფო პრემია
• შრომის წითელი დროშის ორდენი
• ღირსების ორდენი
• საქართველოს დამსახურებული ინჟინერი