ზურაბ ყაჭეიშვილი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1972 წელს; თბილისის სახელმწიფო უნივერსიტეტის ეკონომიკის ფაკულტეტი 1981 წელს.

1981 წლამდე იყო თბილისის ზონალური ს/კ, ტიპური და ექსპერიმენტული პროექტირების ინსტიტუტ "თბილზნიიეპში" სხვადასხვა თანამდებობაზე; მუშაობდა ინსტიტუტის სამეცნიერო ნაწილში; აქტიურად იყო ჩართული მნიშვნელოვანი ობიექტების დაპროექტებისა და სამეცნიერო თემატიკის დამუშავებაში; 1981-1987წწ. იყო პარტიულ სამუშაოზე, საქართველოს კომპარტიის ცენტრალური კომიტეტის აპარატში; 1987 წელს გადაიყვანეს საქართველოს მშენებლობის სამინისტროში მინისტრის მოადგილედ, მოგვიანებით კი საქართველოს სამოქალაქო და სამრეწველო მშენებლობის საპროექტო-სამშენებლო სახელმწიფო გაერთიანების თავმჯდომარის მოადგილედ; მუშაობდა "საქმშენინსპექციის" გენერალური დირექტორის პირველ მოადგილედ, სახელმწიფო გაერთიანება "ტაძარმშენის" თავმჯდომარის მოადგილედ, მშენებლობისა და საშენი მასალების რესპუბლიკური კომერციული ცენტრის გამგეობის თავმჯდომარედ; 1994-1995წწ. იყო საქართველოს პარლამენტის კომისიის ექსპერტ-კონსულტანტი; არის 12 სამეცნიერო ნაშრომისა და 3 ლიცენზირებული გამოგონების ავტორი; მისი გამოგონებებიდან უნდა აღინიშნოს წინასწარ დაძაბული ანაკრები რკინაბეტონის საძირკვლები (დანერგილია ქ. თბილისის ბინათმშენებლობაში) და მაღლივი მრავალსართულიანი სახლებისათვის ანაკრები წინასწარ დაძაბული სიხისტის გულა; მიღებული აქვს სახელმწიფო ჯილდოები, მათ შორის: სსრკ სახალხო მეურნეობის მიღწევათა გამოფენის ოქროს მედალი მეცნიერების დარგში.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.593-594