გიორგი კიკნაძე

დაბადების ადგილი: ქ. ხაშური.

საშუალო განათლება მიიღო ქ. ხაშურში; დაამთავრა ჰუმანიტარული ტექნიკუმი 1923 წელს; თბილისის სახელმწიფო უნივერსიტეტის სოციალურ-ეკონომიკური ფაკულტეტი და მიიღო ეკონომისტის სპეციალობა 1930 წელს. იმავე წელს ჩაირიცხა უნივერსიტეტის ასპირანტურაში.

1929-1934წწ. იმყოფებოდა პარტიულ სამუშაოზე: საქართველოს კომპარტიის თბილისის ორგანიზაციის ლენინის რაიონულ კომიტეტში, თბილისის კომიტეტსა და გარეუბნის რაიონულ კომიტეტში. პარტიულ მუშაობას ათავსებდა პედაგოგიურ მოღვაწეობასთან. 1934 წელს იგი მიავლინეს მოსკოვში უმაღლესი კომუნისტური განათლების ინსტიტუტში სასწავლებლად; 1937 წელს, ამ ინსტიტუტის ასპირანტურის დამთავრების შემდეგ, მან დაიცვა დისერტაცია და მიიღო პედაგოგიკის მეცნიერებათა კანდიდატის სამეცნიერო ხარისხი. იგი დაინიშნა საბჭოთა კავშირის ხალხთა პედაგოგიკის ცენტრალური სამეცნიერო-კვლევითი ინსტიტუტის დირექტორად; 1937 წელს მუშაობდა საქართველოს სსრ განათლების სახალხო კომისრის პირველ მოადგილედ; 1937-1938წწ. იყო თბილისის სახელმწიფო უნივერსიტეტის რექტორი. 1938-1944წწ. იყო საქართველოს სსრ განათლების სახალხო კომისარი; 1944-1952წწ. საქართველოს სსრ საგარეო საქმეთა მინისტრი. ლექციებს კითხულობდა თბილისის სახელმწიფო უნივერსიტეტში. გამოქვეყნებული აქვს შრომები პედაგოგიკის საკითხებზე.

წყარო: საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge