აბდურაჰიმ ახვერდოვი

დაბადების ადგილი: ქ. შუშა, აზერბაიჯანი.

დაიბადა ჟურნალისტის ოჯახში. დაწყებითი განათლება ორწლიან რუსულ-ისლამურ სკოლაში მიიღო. დაამთავრა შუშის რეალური სასწავლებელი. შემდგომში ცხოვრობდა თბილისში, სადაც მასზე დიდი გავლენა მოახდინა ცნობილი აზერბაიჯანელი მწერლის მირზა ფათალი ახუნდოვის შემოქმედებამ. მალევე საცხოვრებლად და განათლების მისაღებად პეტერბურგში გადავიდა. 1892 წელს გამოიცა მისი პირველი პიესა "Yeyarsan gazatini, gorarsan lazzatin", რომელმაც დიდი გავლენა მოახდინა აზერბაიჯანელ მკითხველზე. სწრაფადვე მოიპოვა პოპულარობა. მისი პიესები ხშირად იდგმებოდა სცენაზე. 1906 წლიდან აქტიური წვლილი შეაქვს აზერბაიჯანული სატირული ჟურნალის "მოლლა ნასრედდინის" გამოცემაში. 1905 წლიდან აქტიურ პოლიტიკურ საქმიანობას ეწეოდა მშობლიურ შუშაში. 1906 წელს ელიზავეტპოლის გუბერნიიდან არჩეულ იქნა სახელმწიფო სათათბიროს წევრად. სათათბიროს დათხოვნის შემდეგ გააგრძელა სამწერლობო საქმიანობა. 1917 წლის თებერვლის რევოლუციის დროს ცხოვრობდა თბილისში და აქტიურად იყო ჩართული საქართველოში არსებულ მუსლიმთა ეროვნული საბჭოს საქმიანობაში. 1918 წელს საქართველოს პარლამენტის მიერ აზერბაიჯანელთათვის გამოყოფილი კვოტით  დასახელებულ იქნა პარლამენტის წევრად. 1919 წლიდან მუშაობდა აზერბაიჯანის დემოკრატიული რესპუბლიკის საგარეო საქმეთა სამინისტროში. იყო კონსული საქართველოს დემოკრატიულ რესპუბლიკაში, მთიელთა რესპუბლიკასა და სომხეთის დემოკრატიულ რესპუბლიკაში. აქტიურად მონაწილეობდა ბაქოს სახელმწიფო უნივერისტეტის დაარსებაში. აზერბაიჯანის გასაბჭოების შემდეგ ემიგრაციაში არ წასულა. მუშაობდა თეატრის მმართველ ორგანოებში. აზერბაიჯანის სახელმწიფო უნივერსიტეტში ასწავლიდა აღმოსავლეთმცოდნეობას. იყო აზერბაიჯანის სამეცნიერო საზოგადოების დამფუძნებელი. აზერბაიჯანელი მწერალი, პოლიტიკური მოღვაწე.

წყარო: საქართველოს დემოკრატიული რესპუბლიკა (1918-1921): ენციკლოპედია -ლექსიკონი. -თბ., 2018.-გვ. 49

• რუსეთის მეცნიერებათა აკადემია, წევრ-კორესპონდენტი (1924-)
• საქართველოს დემოკრატიული რესპუბლიკის ეროვნული საბჭო (პარლამენტი), წევრი