შურა ჯაველიძე

დაბადების ადგილი: ქ. თბილისი.

1941 წელს გაიწვიეს საბჭოთა არმიის რიგებში; იყო II მსოფლიო ომის მონაწილე; დემობილიზაციის შემდეგ დაამთავრა საქართველოს პოლიტექნიკური ინსტიტუტი არქიტექტურის სპეციალობით.

ინსტიტუტის დამთავრების შემდეგ სწავლის გასაგრძელებლად გაემგზავრა ქ. მოსკოვში, სადაც დაამთავრა ასპირანტურა და იქვე დაიწყო შრომითი საქმიანობა; ქ. მოსკოვში მოღვაწეობის პერიოდში მუშაობდა საპროექტო ორგანიზაციაში; მონაწილეობდა ქ. მოსკოვის მნიშვნელოვანი ობიექტების პროექტირებაში; 1962 წელს დაბრუნდა თბილისში და მუშაობა დაიწყო თბილისის ზონალურ სამეცნიერო-კვლევით, ტიპური და ექსპერიმენტული პროექტების ინსტიტუტში ("თბილზნიეპი"), სადაც მუშაობდა ტექნიკური განყოფილების გამგედ; მონაწილეობდა საცხოვრებელი და საზოგადოებრივი დანიშნულების ნაგებობების ახალი კონსტრუქციული სქემების, უნიფიცირებელი ნაკეთობებისა და ტიპური პროექტების შემუშავებაში; 1976-1989წწ. მუშაობდა საპროექტო ინსტიტუტ "საქკურორტპროექტში" ტექნიკური განყოფილების გამგედ; მონაწილეობდა მნიშვნელოვანი საკურორტო დანიშნულების ობიექტებისა და სპორტულ-გამაჯანსაღებელი კომპლექსების პროექტირებაში; მიღებული ჰქონდა საუწყებო საპატიო სიგელები და ჯილდოები.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.734