ავთანდილ ჯღარკავა

დაბადების ადგილი: სოფელი ლეხაინდრაო, მარტვილის რაიონი.

დაამთავრა საქართველოს პოლიტექნიკური ინსტიტუტის სამთო ფაკულტეტი სამთო ელექტრო-მექანიკოსის კვალიფიკაციით 1954 წელს.

1955 წელს შრომითი საქმიანობა დაიწყო უკრაინის ქალაქ სტალინოში (დღევანდელი დონეცკი); გაიარა ყველა სამსახურებრივი საფეხური უბნის მექანიკოსობიდან დაწყებული მაღაროს მთავარ მექანიკოსობით დამთავრებული; 1961 წლიდან საცხოვრებლად გადმოვიდა ქალაქ რუსთავში და მუშაობა დაიწყო საქართველოს მშენებლობის სამინისტროს რუსთავის სახლმშენებელ კომბინატში მთავარ მექანიკოსად; 1966 წლიდან იყო იმავე სამინისტროს N1 სამშენებლო ტრესტის მთავარი მექანიკოსი; 1968 წლიდან რუსთავის სარემონტო-მექანიკური ქარხნის დირექტორი; 1971 წლიდან რუსთავის ავტოსატრანსპორტო გაერთიანების დირექტორი; 1972 წლიდან მექანიზაციის სამმართველოს უფროსი; 1973 წლიდან რკინაბეტონის ნაკეთობათა ქარხნის დირექტორი; 1975 წლიდან საგზაო და სამშენებლო მანქანების სარემონტო ქარხნის დირექტორი; 1978 წელს დაინიშნა საქართველოს მშენებლობის სამინისტროს სპეციალური მექანიზაციის ტრესტის ქუთაისის მექანიზაციის N2 სამმართველოს უფროსად; 1980 წლიდან რკინაბეტონის ნაკეთობათა კომბინატის დირექტორად; სხვადასხვა წლებში მშენებლობის საკავშირო და რესპუბლიკური სამინისტროებისაგან მიღებული ჰქონდა საპატიო სიგელები, ასევე სახელმწიფო ჯილდოები მრავალწლიანი, კეთილსინდისიერი შრომითი საქმიანობისათვის; არაერთგზის იყო არჩეული რუსთავისა და ქუთაისის საქალაქო საბჭოების დეპუტატად.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.760-761