სტეფანე მხარგრძელი

დაბადების ადგილი: სოფელი ველისციხე, გურჯაანის რაიონი.

დაამთავრა თბილისის სახელმწიფო უნივერსიტეტის ჟურნალისტიკის გამყოფილება 1954 წელს.

სამწერლო ასპარეზზე გამოვიდა 1939 წელს, ჟურნალ "ნიანგში", იუმორისტული ლექსით "რა ვიცოდი!"; 1942 წელს მუშაობა დაიწყო გურჯაანის რაიონულ გაზეთ "მევენახეს" რედაქციაში ლიტერატურულ მუშაკად, შემდეგ პასუხისმგებელ მდივნად, გაზეთ "კომუნისტის" კულტურისა და ყოფაცხოვრების განყოფილების გამგედ, გაზეთ "წიგნის სამყაროს" რედაქტორის მოადგილედ; 1942 წლის ოქტომბრიდან, საბჭოთა არმიაში გაწვევის შემდეგ, მუშაობდა წითელარმიულ გაზეთებში ("სამშობლოს სადარაჯოზე", "სამშობლოს დამცველი", "ლენინური დროშა" და სხვ.); 1939 წელს-ალკკ, ხოლო 1943 წელს საკავშირო კომუნისტური პარტიის წევრი გახდა; 1939 წლიდან მისი ლექსები, პოემები, მოთხრობები, რეცენზიები იბეჭდებოდა რაიონულ და ცენტრალურ ჟურნალ-გაზეთებში; მისი ნაწარმოებების თემებია: სამამულო ომი, კოლმეურნეობა, სოციალისტური მშენებლობა და სხვა; 1949-1962წწ. ეკავა გაზეთ "კომუნისტის", საოლქო გაზეთ "გამარჯვების", "თბილისის", "სოფლის ცხოვრების" რედაქციებში პასუხსაგები თანამდებობები; 1968-1993წწ. იყო "წიგნის სამყაროს" მთავარი რედაქტორის მოადგილე; ეროვნულ მოძრაობაში იყო 1980-იანი წლების ბოლოს; დაწერილი აქვს მრავალი ნარკვევი, ფელეტონი, რეპორტაჟი, ინტერვიუ, კორესპონდენცია; გამოცემული აქვს ლექსების კრებულები: "უკვდავი სახელები", "საქართველოს წყაროები" (1963), "წამო, გომბორზე გადაგახედო" (1982), "ჯაგანი". საყოველთაო ყურადღება მიიპყრო პოემებმა: "გარდამავალი დროშა" და "მოლოდინი". თარგმნიდა რუსული და ინგლისური ენებიდან. ნათარგმნი აქვს რუსული კლასიკური და ყოფილი სსრკ-ს ხალხთა პოეზიის არაერთი ნიმუში. მიღებული აქვს სახელმწიფო ჯილდოები.

წყარო: ქართველ მოღვაწეთა ლექსიკონი:1801-1952: ტ.I .-თბ.,2018.-გვ.204; ქართველი პოეტები : ენციკლოპედია / შეადგინა ალექსანდრე ელერდაშვილმა.- თბ.,2021.-გვ. 235;  ნახევარი საუკუნე თეთრ ტაძარში : შტრიხები ჟურნალისტიკის ფაკ. მატიანისათვის / იზოლდა ხაინდრავა.-თბ.,2005.-გვ.235; კარგ ქართველთა საფლავები: geonecropol.ge

• საქართველოს მწერალთა კავშირი, წევრი (1959-)
• საქართველოს ჟურნალისტთა ფედერაცია, წევრი (1957-)

• გიორგი დავითაშვილი : მონოგრაფია (ავტორი). - თბილისი, ხელოვნება, 1956. - 56გვ.
• ჟურნალისტის ჩანაწერები : ნარკვევი (ავტორი). - თბილისი, სახელგამი, 1955. - 160გვ.
• უკვდავი სახელი : ლექსები (ავტორი). - თბილისი, სახელგამი, 1953. - 95გვ.