ამაზასპი (მეფე)

ქართლის მეფე III საუკუნის შუახანებში. ქართული წყაროების გარდა, იხსენიება სპარსეთის მეფის შაბურ I-ის (242-272) ქააბა-ი-ზარდოშტის დიდ წარწერაში ("ამაზასპი, მეფე იბერიისა"), როგორც პირი, რომელსაც სპარსეთის მეფის კარზე ერთ-ერთი პირველი ადგილი ეკავა. ამაზასპი სასანიანთა ირანის ერთ-ერთი ყველაზე უფრო გავლენიანი მოკავშირე ჩანს. მის ირანულ ორიენტაციას "ქართლის ცხოვრებაც" გვიდასტურებს. ამ წყაროს მიხედვით, იგი სპარსელებთან ერთად იბრძოდა რომაელების წინააღმდეგ და ამ ბრძოლაში დაღუპულა. ამაზასპის დროს ქართლი ძლიერი სახელმწიფო იყო. "ქართლის ცხოვრებაში" ვრცლად არის მოთხრობილი ქართლში შემოჭრილ ოსებთან (ალანებთან) მისი ბრძოლის ამბავი.

წყარო: ქართული საბჭოთა ენციკლოპედია: ტ.1.-თბ., 1975.-გვ.347