გიორგი ჯალაბაძე

დაბადების ადგილი: სოფელი ქორდი, გორის რაიონი.

დაამთავრა თბილისის სახელმწიფო უნივერსიტეტის ისტორიის ფაკულტეტი 1950 წელს.

1941 წელს ჩააბარა თბილისის საავიაციო სასწავლებელში; 1941-1943 წწ. იბრძოდა კავკასიის ფრონტზე; 1943-1945 წწ. მუშაობდა მასწავლებლად გორის რაიონის სოფ. არბოს საშუალო სკოლაში; 1950 წლიდან მუშაობა დაიწყო საქართველოს სახელმწიფო მუზეუმში ჯერ პრეპარატორად, შემდეგ მეცნიერ თანამშრომლად; 1951-1954 წწ. სწავლობდა საქ სსრ. მეცნიერებათა აკადემიის ასპირანტურაში; 1961 წლიდან სიცოცხლის ბოლომდე ხელმძღვანელობდა საქართველოს  სახელმწიფო მუზეუმის ეთნოგრაფიის განყოფილებას; მისი ხელმძღვანელობით  და უშუალო მონაწილეობით მუზეუმის ეთნოგრაფიის განყოფილებაში განხორციელდა არაერთი მნიშვნელოვანი სამუშაო ფონდების მოვლა-პატრონობის, შევსების, მეცნიერული შესწავლის, პუბლიკაციისა და ექსპონირების მიმართულებით; საქართველოს სხვადასხვა კუთხეში მისი ხელმძღვანელობით მოწყობილი მრავალი ეთნოგრაფიული ექსპედიციის შედეგად მუზეუმში შემოვიდა მნიშვნელოვანი ახალი მასალა, მომზადდა და გამოქვეყნდა საქართველოს სხვადასხვა რეგიონების ეთნოგრაფიული შესწავლის შედეგებზე დამყარებული კრებულები. მნიშვნელოვანია მისი ღვაწლი ღია ცის ქვეშ ეთნოგრაფიული მუზეუმის შექმნის საქმეში; იგი იყო მრავალი ადგილობრივი თუ საერთაშორისო სამეცნიერო კონფერენცის მონაწილე; მუდმივად ზრუნავდა თანამშრომელთა კვალიფიკაციის ამაღლებაზე  და ახალგაზრდა კადრების მომზადებაზე, კითხულობდა ლექციებს საქართველოს სხვადასხვა უმაღლეს სასწავლებელში. არის 15 მონოგრაფიისა და 100-მდე სამეცნიერო სტატიის ავტორი. ისტორიის მეცნიერებათა დოქტორი.

საკანდიდატო დისერტაციის თემა – "აღმოსავლეთ საქართველოს სამიწათმოქმედო იარაღების ისტორიიდან", დაიცვა 1955 წელს; სადოქტორო დისერტაციის თემა – "მემინდვრეობის კულტურა საქართველოში: ისტორიულ-ეთნოგრაფიული გამოკვლევა", დაიცვა 1972 წელს. 

წყარო:  ომგადახდილი მეცნიერები : საგამომცემლო ცნობები. კრებული / შემდგ.: გრიგოლ ბრეგაძე. - თბ., 2000. გვ. 146-147

• მედალი "მამაცური შრომისთვის"
• მედალი "კავკასიის დაცვისთვის"
• მედალი "გერმანიაზე გამარჯვებისთვის"
• დიდების I ხარისხის ორდენი
• სამამულო ომის I ხარისხის ორდენი

• მემინდვრეობის კულტურა დასავლეთ საქართველოში (ავტორი). - თბილისი, მეცნიერება, 1990. - 124გვ.
• ქართული ხალხური ტანსაცმელი (თანაავტორი). - თბილისი, მეცნიერება, 1988. - 26გვ.
• მემინდვრეობის კულტურა აღმოსავლეთ საქართველოში : ისტორიულ-ეთნოგრაფიული გამოკვლევა (ავტორი). - თბილისი, მეცნიერება, 1986. - 315გვ.
• საქართველოს სახელმწიფო მუზეუმის ეთნოგრაფიული ფონდების გზამკვლევი (ავტორი). - თბილისი, მეცნიერება, 1979. - 48გვ.
• საქართველოს სახელმწიფო მუზეუმის დროშების კატალოგი (თანაავტორი). - თბილისი , მეცნიერება, 1969. - 55გვ.
• მიწათმოქმედება ფშავ-ხევსურეთში : ეთნოგრ. ნარკვევი (ავტორი). - თბილისი, საქ. სსრ მეცნ. აკად. გამ-ბა, 1963. - 81გვ.
• აღმოსავლეთ საქართველოს სამიწათმოქმედო იარაღების ისტორიიდან (ავტორი). - თბილისი, საქ. სსრ მეცნ. აკად. გამ-ბა და სტ., 1960. - 177გვ.