დავით გედევანიშვილი

დაბადების ადგილი: დაბა მანგლისი, თეთრიწყაროს მუნიციპალიტეტი.

დაამთავრა თბილისის პირველი გიმნაზია და მოსკოვის უნივერსიტეტი 1884 წელს.

1885-1889წწ. ხელმძღვანელობდა მოძრავ ლაზარეთებს კასპიის მხარეში. 1889-1916წწ. იყო თბილისის  მიხეილის საავადმყოფოს ფსიქიატრიული განყოფილების ორდინატორი. 1892 წელს აქტიურ მონაწილეობას იღებდა ქოლერის საწინააღმდეგო ბრძოლაში თელავის, სიღნაღის და დუშეთის მაზრებში. 1894-1920წწ. ინსპექტირებას უწევდა თბილისის  მიხეილის საავადმყოფოსთან არსებულ საფერშლო სკოლას, სადაც ასწავლიდა ანატომიას, ფარმაკოლოგიას, ფიზიოლოგიას და ჰიგიენას. იგი უსასყიდლოდ მკურნალობდა ქართული გიმნაზიის ღარიბ მოსწავლეებს, სახელმწიფო ოპერის სცენის მუშებს. ასწავლიდა კბილის ექიმთა სასწავლებელში, ქალთა საფერშლო სკოლაში. იყო წითელი ჯვრის საზოგადოების გამგის თანაშემწე, სრულიად უფასოდ მონაწილეობდა საზოგადოებრივ-საქველმოქმედო და კულტურულ საქმიანობაში, ხელმძღვანელობდა საგამოცდო-საექსპერტო კომისიებს, თავმჯდომარეობდა პირველი სახელმწიფო სათათბიროს არჩევნებს თბილისში, პრესაში გაბედულად აშუქებდა საზოგადო ხასიათის საკითხებს, წერდა სამედიცინო-სამეცნიერო შინაარსის სტატიებს "სამედიცინო მიმოხილვაში", მონაწილეობდა სამკურნალო ჟურნალ "საუნჯის" სარედაქციო მუშაობაში, როგორც სარედაქციო კოლეგიის თავმჯდომარე. 1925 წლის 25 ივნისს დავით გედევანიშვილს თბილისში გადაუხადეს მოღვაწეობის 40 წლის იუბილე. ფსიქიატრი, ნევროპათოლოგი. (მცხეთის გედევანიშვილთაგანი). 

წყარო: ქართველ მოღვაწეთა ლექსიკონი, 1801-1952: ტ. I ა-დ / იოსებ იმედაშვილი.-თბ.,2018.-გვ.538

• 1935 - შრომის გმირი
• საქართველოს დამსახურებული ექიმი

• ეპილეფსია ავი-ზნე ბავშვურს, სკოლამდე და სასკოლო ჰასაკში უახლესი ლიტერატურის მიხედვით (Author). - ტფილისი, სახელგამი, 1932. - 40გვ.