ვალენტინა იასნოში

დაბადების ადგილი: ქ. სანქტ-პეტერბურგი.

დაამთავრა ლენინგრადის სასოფლო-სამეურნეო ინსტიტუტის მცენარეთა დაცვის ფაკულტეტი 1946 წელს.

1953-1966წწ. მუშაობდა თბილისში მცენარეთა კარანტინის სამსახურის ლაბორატორიაში მთავარ სპეციალისტად; 1966 წლიდან მოღვაწეობდა საქართველოს მცენარეთა დაცვის სამეცნიერო-კვლევით ინსტიტუტში. 1967 წელს მოსკოვში მიიღო მედალი ბიოლოგიური კონტროლისათვის საქართველოში; 1976-1997წწ. იყო ამავე ინსტიტუტის ბიოლოგიური კონტროლის განყოფილებბის უფროსი; 1975-2001წწ. მონაწილეობდა საერთაშორისო ფორუმებში (მოსკოვი, იაპონია, დიდი ბრიტანეთი, იტალია, ისრაელი, უნგრეთი, მექსიკა) მცენარეთა დაცვის განხრით; მისი სამეცნიერო კვლევის ძირითადი მიმართულება იყო სასარგებლო ორგანიზმების ინტროდუქცია და მათი გამოყენება მცენარეთა მავნებლებისა და სარეველების წინააღმდეგ; საქართველოში თანამშრომლებთან ერთად სხვადასხვა ქვეყნიდან განახორციელა სასრგებლო მწერების (როდოლია – Rodolia cardinalis კრიპტოლემუსი – Cryptolaemus montrouzieri და სხვ.) იმპორტი, აკლიმატიზაცია და გამოყენება; გამოიკვლიეს სხვადასხვა აგროცენოზის ენტომოფაუნა, მათი ბუნებრივი მტრები – ენტომოფაგები, დაინერგა მცენარეთა მავნებლების წინააღმდეგ ბრძოლის ბიოლოგიური მეთოდი; კვერცხის პარაზიტი ტრიქოგრამა (Trichogramma evanescens) გამოიყენება სიმინდის ნათესებისა და კომბოსტოს ნარგავების მავნე მწერებთან საბრძოლველად, პათოგენური სოკო აშერსონია (Aschersonia) – მავნებლებისაგან ციტრუსების მიკრობიოლოგიური დაცვისათვის და სხვ. ასევე შემუშავდა ფრთათეთრას პარაზიტი მწერის – ენკარზიას (Encarsia formosa) გამრავლებისა და გამოყენების ტექნოლოგია ბოსტნეული კულტურების დახურული გრუნტის მეურნეობისათვის; 2012 წლიდან მისი სამეცნიერო კოლექცია დაცულია საქართველოს ეროვნულ მუზეუმში; ავტორია მრავალი სამეცნიერო ნაშრომისა; მიღებული აქვს სახელმწიფო ჯილდოები. ენტომოლოგი, ბიოლოგიის მეცნიერებათა დოქტორი (1977), პროფესორი (1991).

წყარო: საქართველო: ენციკლოპედია: ტ. IV. -თბ., 2018. -გვ.172