ნიკოლოზ რთველიაშვილი

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის გეოგრაფია-გეოლოგიის ფაკულტეტი  ეკონომიკური და სოციალური გეოგრაფიის სპეციალობით 1978 წელს; 1979-1983წწ. იყო მოსკოვის ლომონოსოვის სახელობის სახელმწიფო უნივერსიტეტის გეოგრაფიის ფაკულტეტის ასპირანტი; 1996-1997წწ. ფულბრაიტის სტიპენდიანტი ჯორჯ ვაშინგტონის უნივერსიტეტში (აშშ); 2001 წელს გაიარა რომის ნატოს თავდაცვის კოლეჯის პარტნიორობა მშვიდობისათვის და ეუთოს ინტეგრირებული კურსი.

1983-1992წწ. მუშაობდა თბილისის სახელმწიფო უნივერსიტეტის ეკონომიკური და სოციალური გეოგრაფიის კათედრის უფროს მეცნიერ-თანამშრომლად; 1992 წლიდან იყო საქართველოს საგარეო საქმეთა სამინისტროს ნატოსა და განიარაღების სამმართველოს უფროსი; 1993 წლიდან ვენის საერთაშორისო ორგანიზაციებსა და ეუთოში საქართველოს მუდმივი წარმომადგენლობის პირველი მდივანი; 1993-1995წწ. ერთობლივი საწარმო "მეტეხის" გენერალური დირექტორი და ავიაკომპანია "ორბი საქართველოს ავიახაზების" კომერციული დირექტორი; 1995-1996წწ. საქართველოს საგარეო საქმეთა სამინისტროს ამერიკის სამმართველოს უფროსი; 1997-2001წწ. ავსტრიის რესპუბლიკაში საქართველოს საელჩოს უფროსი მრჩეველი; 2001 წლიდან საქართველოს საგარეო საქმეთა სამინისტროს სამხედრო-პოლიტიკური დეპარტამენტის დირექტორის მოადგილე. პარალელურად, 1983-1992წწ. გეოგრაფიულ საგნებში ლექციებს კითხულობდა თბილისის სახელმწიფო უნივერსიტეტში, თბილისის უცხო ენათა ინსტიტუტში და გორის ეკონომიკის ინსტიტუტში. 2008-2011წწ. იყო უსაფრთხოების პოლიტიკისა და ევროატლანტიკური ინტეგრაციის დეპარტამენტის დირექტორი საქართველოს საგარეო საქმეთა სამინისტროში; 2011-2017 წწ. დანიის სამეფოში საქართველოს საგანგებო და სრულუფლებიანი ელჩი. საქართველოს საგარეო საქმეთა სამინისტროს ლევან მიქელაძის სახელობის დიპლომატიურ-სასწავლო და კვლევითი ინსტიტუტის მკვლევარი. 2017-201წწ. იგი საგანგებო დავალებათა ელჩია საგარეო საქმეთა სამინისტროში ქიმიური, ბიოლოგიური, რადიაციული და ბირთვული საფრთხეების შემცირების მიმართულებით (ქბრბ); 2018 წლის მაისიდან არის საგარეო საქმეთა სამინისტროს ლევან მიქელაძის სახელობის დიპლომატიური სასწავლო და კვლევითი ინსტიტუტის ელჩი-მკვლევარი, ამასთანავე საგარეო საქმეთა სამინისტროს სპეციალური წარმომადგენელი ქბრბ საფრთხეების შემცირების საკითხებში.
საკანდიდატო დისერტაციის თემა - "მსხვილი ქალაქის ვაჭრობის გეოგრაფია (თბილისის მაგალითზე)", დაიცვა 1985 წელს (ქ. მოსკოვის სახელმწიფო უნივერსიტეტი).

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.223-224; დამოუკიდებელი საქართველოს ელჩები, 1991-2021: ნაწილი 1/ ჭუმბურიძე, ზვიად. - თბ., 2021. გვ.139