კუკური წიქარიშვილი

დაბადების ადგილი: ქ. ბორჯომი.

დაამთავრა თბილისის სახელმწიფო უნივერსიტეტის გეოგრაფია-გეოლოგიის ფაკულტეტი ინჟინერ-მეტეოროლოგის სპეციალობით 1973 წელს.

1973 წლიდან მუშაობს ვახუშტი ბაგრატიონის სახელობის გეოგრაფიის ინსტიტუტში, 1973-1977წწ. - უფროსი ლაბორანტი; 1977-1979წწ. - ინჟინერი; 1979-1982წწ. - უფროსი ინჟინერი; 1982 წლიდან უფროსი მეცნიერი. 1973 წლიდან საქართველოს კარსტული ზოლის დაბალი, საშუალო და მაღალმთიანი კირქვული მასივების შემსწავლელი 50-მდე სპელეოლოგიური და ბუნების სტიქიური მოვლენების შემსწავლელი სამეცნიერო ექსპედიციების მონაწილე. 1973 წელს ჩაირიცხა ინსტიტუტის სამეცნიერო ხარისხის მაძიებლად. საქართველოს კარსტული ზოლის განსხვავებულ ბუნებრივ ლანდშაფტურ ზონაში მდებარე მსგავსი მორფოლოგიის მქონე სიღრუეებში ჩატარებული მეტეოდაკვირვებების სტატისტიკური დამუშავებით, ჩამოყალიბდა კონცეფცია მღვიმის ჰაერის ტემპერატურასა და აბსოლუტურ სინოტივეზე ჰიფსომეტრიული ფაქტორის გავლენის შესახებ, რაც ნებისმიერი სიმაღლითი ზონის მღვიმეებისათვის კლიმატური რეჟიმის პროგნოზირების საშუალებას იძლევა. დამუშავებული იქნა აგრეთვე რიგი პრაქტიკული საკითხები. აგრძელებს მუშაობას მთიანი მხარეების სპელეოკლიმატური, კარსტო-სპელეოგენეზის პრობლემაზე. გამოქვეყნებული აქვს 2 მონოგრაფია, 1 ბროშურა, 115 სამეცნიერო სტატია, მათ შორის 30-ზე მეტი - სპელეოლოგთა საკავშირო (პერმი, 1981; მოსკოვი, 1982, 1990; კიევი, 1987; სანქტ-პეტერბურგი, 1990 და სხვ.) და საერთაშორისო (ბარსელონა, 1985; თბილისი, 1987; კოშიცე, 1988; სოფია, 1990 და სხვ.) სიმპოზიუმებისა და კონგრესის მასალებში. გეოგრაფიის აკადემიური დოქტორი. 

საკანდიდატო დისერტაციის თემა - "საქართველოს კარსტული მღვიმეების კლიმატი მათ მორფოლოგიასა და რეგიონის ლანდშაფტურ თავისებურებებთან დამოკიდებულებით",  დაიცვა 1984 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.297-298; ვახუშტი ბაგრატიონის სახელობის გეოგრაფიის ინსტიტუტი: geography.tsu.ge

• საქართველოს ალექსანდრე ჯავახიშვილის სახელობის გეოგრაფიული საზოგადოება, წევრი
• საქართველოს გარემოს დაცვის სამინისტროს დაცული ტერიტორიების ბუნების ძეგლებად გამოცხადების შემსწავლელი კომისია, წევრი
• საქართველოს ეროვნული სპელეოლოგიური საზოგადოება, წევრი

• კარსტულ-სპელეოლოგიური ტერმინების განმარტებითი ლექსიკონი (თანაავტორი). - თბილისი, თბილისის უნივერსიტეტის გამომცემლობა, 2019. - 246გვ.. - ISBN: 9789941137990
• ახალი ათონის მღვიმე ბუნების იშვიათი ძეგლი : წარსულის გახსენება = Akhali Athoni cave a rare monument of nature : Recollection of the past (Discovery, research, development) : აღმოჩენა, კვლევა, კეთილმოწყობა (ავტორი). - თბილისი, უნივერსალი, 2016. - 104გვ.. - ISBN: 9789941227097
• ჭიათურის მუნიციპალიტეტის კარსტული მღვიმეები : საკადასტრო ცნობარი (თანაავტორი). - თბილისი, უნივერსალი, 2016. - 106გვ. . - ISBN: 9789941228438
• საქართველოს კარსტული მღვიმეები : მოკლე ცნობარი (ავტორი). - თბილისი, თბილ. უნ-ტის გამ-ბა, 2013. - 158გვ. . - ISBN: 9789941132971
• წყალტუბოს მღვიმური სისტემა (თანაავტორი). - თბილისი, გეოგრაფიის ინ-ტი, 2009. - 72გვ.. - ISBN: 9789941906350