ჯუმბერ ჯიშკარიანი

დაბადების ადგილი: ქ. სენაკი.

დაამთავრა თბილისის ტოპოგრაფიული ტექნიკუმი და მუშაობდა გეოგრაფიის ინსტიტუტში ტექნიკოს-კარტოგრაფის თანამდებობაზე; ალ. პუშკინის სახელობის სახელმწიფო პედაგოგიური ინსტიტუტი გეოგრაფიის სპეციალობით 1965 წელს.

სტუდენტობის დროს მონაწილეობდა სამეცნიერო ექსპედიციებში და კვლევის შედეგები არაერთ კონფერენციას მოახსენა. უმაღლესი სასწავლებლის დამთავრების შემდეგ მუშაობა დაიწყო ვახუშტი ბაგრატიონის სახელობის გეოგრაფიის ინსტიტუტში; 1986 წლიდან - მეცნიერ თანამშრომელი; 1997-1999წწ. - კარსტოლოგია-სპელეოლოგიის განყოფილების ხელმძღვანელი. მისი მონაწილეობით შესწავლილია 300-ზე მეტი მღვიმე და უფსკრული, მათ შორის, აღსანიშნავია ახალი ათონის მღვიმე, რომლის პირველი გეგმაც მის მიერ არის შედგენილი. 1984 წელს ინსტიტუტის სპელეორაზმმა მისი ხელმძღვანელობით წყალტუბოში (ს. ყუმისთავი) აღმოაჩინა მღვიმე, რომელიც ერთ-ერთი უნიკალურია ევროპაში. 1985 წელს მთავრობის საგანგებო დადგენილებით გადაწყდა მღვიმისა და მიმდებარე ტერიტორიის კეთილმოწყობა. მღვიმეების კეთილმოწყობის საქმეში დაგროვილი მდიდარი გამოცდილების გაცნობის მიზნით იგი 1999 წელს მიავლინეს აშშ-ში. მეცნიერის კვლევის სფერო იყო საქართველოს მღვიმე-უფსკრულების კვლევა, რის შესახებაც 100-ზე მეტი სამეცნიერო ნაშრომი აქვს გამოქვეყნებული. დიდი წარმატებით მოღვაწეობდა ჟურნალისტიკის დარგში. რესპუბლიკურ ჟურნალ-გაზეთებში მას 500-ზე მეტი წერილი აქვს გამოქვეყნებული, რომლებიც მკითხველებში დიდი პოპულარობით სარგებლობდა. გეოგრაფი, სპელეოლოგი, "პრომეთეს" (წყალტუბოს) მღვიმის ერთ-ერთი პირველ აღმომჩენი, ჟურნალისტი.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.333-334; საქართველოს სპელეოლოგთა კლუბი: facebook.com

• საქართველოს გეოგრაფიული საზოგადოება, საპატიო წევრი
• საქართველოს ჟურნალისტთა შემოქმედებითი კავშირი, წევრი
• ფაზისის საერო აკადემია, წევრი
• ქაქუცა ჩოლოყაშვილის ეროვნული საზოგადოება, საპატიო წევრი

• ქ. წყალტუბოს საპატიო მოქალაქე
• სერგეი მესხის სახელობის პრემია
• საქართველოს დამსახურებული ჟურნალისტი

• ეძიებდე და ჰპოვებდე... : ბუნების საოცრებანი... : მღვიმეები (ავტორი). - თბილისი, მერიდიანი, 2017. - 32გვ. . - ISBN: 9789941253973
• ჩვენი ოტია : მწერალი ოტია იოსელიანი (ავტორი). - თბილისი, აზრი, 2014. - 124გვ.. - ISBN: 9789941902345
• წყალტუბოს მღვიმური სისტემა (თანაავტორი). - თბილისი, გეოგრაფიის ინ-ტი, 2009. - 72გვ. . - ISBN: 9789941906350
• В пещерах Грузии : Альбом (ავტორი). - Тбилиси, Сабчота Сакартвело, 1986. - 92с.
• საქართველოს კარსტული მღვიმეების კადასტრი (თანაავტორი). - თბილისი, მეცნიერება, 1966. - 259გვ.