იასონ მეცხვარიშვილი

დაბადების ადგილი: სოფელი მერეთი, გორის რაიონი.

დაამთავრა თბილისის სახელმწიფო უნივერსიტეტის პედაგოგიური ფაკულტეტის მათემატიკური განყოფილება 1929 წელს.

1929-1932წწ. იყო თბილისის მუშათა ფაკულტეტსა და ქიმიის ტექნიკუმში მათემატიკის მასწავლებელი; 1930-1932წწ. ამიერკავკასიის ენერგეტიკის ინსტიტუტისა და პოლიტექნიკური ინსტიტუტის უმაღლესი მათემატიკის კათედრის ასისტენტი; 1932-1935წწ. ლენინგრადის სახელმწიფო უნივერსიტეტის მექანიკისა და მათემატიკის კვლევითი ინსტიტუტის ასპირანტი; 1933 წლიდან - თბილისის სახელმწიფო უნივერსიტეტთან არსებულ მათემატიკისა და ფიზიკის სამეცნიერო-კვლევითი ინსტიტუტის თანამშროელი; 1935-1941წწ. თბილისის მათემატიკის ინსტიტუტის უფროსი მეცნიერ-თანამშრომელი; 1936 წლიდან - ქუთაისის პედაგოგიური ინსტიტუტის ფიზიკა-მათემატიკის ფაკულტეტი; 1938-1949წწ. - ქუთაისის პედაგოგიურ ინსტიტუტში ალგებრა-გეომეტრიის კათედრის ხელმძღვანელი; 1949-1977წწ. ა. პუშკინის სახელობის თბილისის პედაგოგიურ ინსტიტუტში მათემატიკური ანალიზის კათედრის გამგე. იგი იკვლევდა ორი დამოუკიდებელი ცვლადის ცვლადკოეფიციენტებიანი ჰიპერბოლური ტიპის განტოლების ეგრეთწოდებულ ზღვურ ანუ განზოგადებულ ამონახსნებს; ასევე იკვლევდა კომპლექსური ცვლადის ფუნქციათა თეორიის საკითხებს; მან შეისწავლა ლომელის ფუნქციებთან დაკავშირებული საკითხები და ანალიზურ ფუნქციათა თეორიაში პარამეტრის მეთოდის გამოყენებით მოგვცა კომპლექსური არგუმენტის რვა ანალიზური ფუნქციის ლომელის ფუნქციებად გაშლის მის მიერ დადგენილი ფორმულები. მიღებული აქვს სახელმწიფო ჯილდოები. ფიზიკა-მათემატიკის მეცნიერებათა დოქტორი (1972), პროფესორი (1973).

წყარო: საქართველოს მათემატიკოსები და მექანიკოსები: ბიოგრაფიული ცნობარი/ნოდარ მახვილაძე. -თბ., 2016. -გვ.252-253

• 1961 - საპატიო ნიშნის ორდენი

• მეორე რიგის ჩვეულებრივი დიფერენციალური განტოლებანი (ავტორი). - თბილისი, განათლება, 1968. - 78გვ.
• პირველი რიგის ჩვეულებრივი დიფერენციალური განტოლებანი : მეთოდ. მითითებანი პედ. ინ-ტების ფიზ.-მათ. ფაკ-ტის დაუსწრ. სწავლებისა და საღამოს განყ-ბების სტუდენტთათვის (ავტორი). - თბილისი, განათლება, 1966. - 75გვ.
• წრფივ დიფერენციალურ განტოლებათა სისტემისა და n-ური რიგის წრფივ დიფერენციალურ განტოლებათა თეორიის ელემენტები : მეთოდ. მითითებანი პედ. ინ-ტების ფიზ.-მათ. ფაკ-ტის დაუსწრ. სწავლებისა და საღამოს განყ-ბის სტუდენტებისათვის (ავტორი). - თბილისი, ცოდნა, 1962. - 82გვ.
• კომპლექსური ცვლადის ფუნქციათა თეორია (ავტორი). - თბილისი, სამეცნ.-მეთოდ. კაბინეტის გამ-ბა, 1955. - 328გვ.
• დიფერენციალურ და ინტეგრალურ აღრიცხვათა საფუძვლები (მთარგმნელი) // ნაწ. 2, ინტეგრალური აღრიცხვა. - ტფილისი, სახელგამი, 1932. - 199გვ.