ჯონდო შარიქაძე

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის ფიზიკის ფაკულტეტი 1954 წელს.

1953 წლიდან იყო თბილისის სახელმწიფო უნივერსიტეტის ტექნიკური მექანიკის კათედრაის ლაბორანტი; 1957 წლიდან - მოსკოვის სახელმწიფო უნივერსიტეტის თეორიული და სტატისტიკური ფიზიკის კათედრის ასპირანტი; 1962 წელს საკავშირო მეცნიერებათა აკადემიის მექანიკის ინსტიტუტში დაიცვა დისერტაცია ფიზიკა-მათემატიკის მეცნიერებათა კანდიდატის ხარისხის მოსაპოვებლად; 2003 წელს დაიცვა სადოქტორო დისერტაცია; 1960-2009წწ. თბილისის სახელმწიფო უნივერსიტეტის მექანიკა-მათემატიკის ფაკულტეტი (ასისტენტი, დოცენტი, პროფესორი); 2009 წლიდან - ი. ვეკუას სახელობის გამოყენებითი მათემატიკის ინსტიტუტის წამყვანი მკვლევარი; საქართველოში მან პირველმა დაიწყო გამოკვლევები მაგნიტურ ჰიდროდინამიკაში; შეისწავლა გამტარი გარემოს სასაზღვრო ფენის როგორც სტაციონარული, ასევე არასტაციონარული ამოცანების განტოლებების მიახლოებითი ამონახსნები, როგორც მუდმივი, ასევე ცვლადი გამტარებლობის გათავლისწინებით; მის მიერ შესწავლილია მაგნიტური ჰიდროდინამიკის მრავალი ამოცანა; მათ შორის, ბლანტი ელექტროგამტარი სითხის სტაციონარული და არასტაციონარული დინებები, მაგნიტური ჰიდროდინამიკის სასაზღვრო ფენის ამოცანა ძლიერი გაჟონვისა და ძლიერი მაგნიტური ველის შემთხვევაში და სხვ. შესწავლილია ბლანტი ელექტროგამტარი სითხის სტაციონარული და არასტაციონარული დინებები მილებში, მილის კედლის ფოროვნებისა და სითხის ტემპერატურის გათვალისწინებით; გამოკვლეულია ჰიდროდინამიკური მდგრადობისა და ბიფურკაციის საკითხები; ზოგიერთ ამოცანაში გათავლისწინებულია სითხის სითბოგამტარებლობა და ელექტროგამტარობა; იკვლევდა მათემატიკური მეცნიერების ისტორიის საკითხებს. გამოქვეყნებული აქვს 150-მდე სამეცნიერო სტატია, სამი სახელმძღვანელო, შვიდი მონოგრაფია და ხუთი ბროშურა. იგი მონაწილეობდა მრავალ კონფერენ­ციაში, როგორც საქართველოში, ისე საზღვარ­გარეთ. ჰქონდა მჭიდრო პროფესიული კონ­ტაქტები ქართველ და უცხოელ კოლეგებთან. ჰიდრო-აეროდინამიკისა და მაგნიტური ჰიდროდინამიკის სპეციალისტი, ფიზიკა-მათემატიკის მეცნიერებათა დოქტორი (2003), პროფესორი (2003).

წყარო: საქართველოს მათემატიკოსები და მექანიკოსები: ბიოგრაფიული ცნობარი /ნოდარ მახვილაძე. -თბ., 2016. -გვ.291-292; საქართველოს მათემატიკოსთა კავშირი: gmu.gtu.ge

• საქართველოს მათე­მა­ტი­კოს­თა კავშირი, პრეზიდენტი (2005-2009)
• საქართველოს მექანიკოსთა კავ­შირი, პრეზიდიუმის წევრი
• საქართველოს საინჟინრო აკადემია, საპატიო აკადემიკოსი (2007-)

• 2014 - ღირსების ორდენი
• 2002 - ივანე ჯავახიშვილის სახელობის მედალი

• მათემატიკური მეცნიერების განვითარება საქართველოში უძველესი დროიდან XXI საუკუნემდე (თანაავტორი). - თბილისი, შპს "გლობუსი", 2014. - 307გვ. . - ISBN: 9789941065187
• მსოფლიოს მექანიკოსები მექანიკის სათავეებთან : მექანიკის მოკლე ისტორია (თანაავტორი). - თბილისი, ტექნ. უნ-ტი, 2006. - 438გვ. . - ISBN: 9994056247
• უწყვეტ გარემოთა მექანიკის მათემატიკური მოდელები : ლექციების კურსი (რედაქტორი). - თბილისი, თბილ. უნ-ტის გამ-ბა, 2004. - 338გვ. . - ISBN: 999401255X
• ბლანტი არაკუმშვადი სითხის დინამიკა (ავტორი). - თბილისი, თბილ. უნ-ტის გამ-ბა, 1997. - 227გვ.
• იდეალური სითხის მექანიკა (ავტორი). - თბილისი, ევრიკა, 1993. - 220გვ.