მიხეილ გურგენიძე

დაბადების ადგილი: ქ. ონი.

დაამთავრა საქართველოს პოლიტექნიკურ ინსტიტუტი ინჟინერ-ელექტრიკოსის კვალიფიკაციით 1950 წელს.

სამუშაოდ გააგზავნეს ქ. ლენინგრადში ელექტრომანქანათმშენებლობის გაერთიანება - "ელექტროსილაში", სადაც 1958 წლამდე გაიარა გზა ინჟინრიდან ქარხნის ცენტრალური ლაბორატორიის გამგის მოადგილემდე; ამავე პერიოდში შეთავსებით მუშაობდა ყოფილი საბჭოთა კავშირის მეცნიერებათა აკადემიის ელექტროტექნიკის ინსტიტუტის უფროსი მეცნიერი მუშაკის თანამდებობაზე; 1958 წელს საქართველოში მაგისტრალური ელმავლის ათვისებასა და მშენებლობასთან დაკავშირებით იგი, როგორც ინჟინერი, მიიწვიეს თბილისის ელმავალმშენებელ ქარხანაში, სადაც 1963 წლამდე მუშაობდა ჯერ უფროს ოსტატად, შემდეგ კი - ელმავლების დაპროექტების სპეციალურ საკონსტრუქტორო ბიუროში საკვლევი განყოფილების უფროსად; მან უშუალო მონაწილეობა მიიღო ახალი ქართული მაგისტრალური ელმავლების მშენებლობაში, გამოცდასა და სერიულ ათვისებაში; მისი თაოსნობით და ხელმძღვანელობით ქარხანაში შეიქმნა უნიკალური საგამოცდო ცენტრი ძრავებისათვის, რომელსაც დღესაც ანალოგი არ გააჩნია; 1963 წელს მიიწვიეს საქართველოს პოლიტექნიკური ინსტიტუტის სამრეწველო ელექტრონიკის კათედრის დოცენტად; 1971 წელს მისი თაოსნობით ჩამოყალიბდა რკინიგზის ტრანსპორტზე ავტომატიკისა და კავშირგაბმულობის კათედრა, რომელსაც 1983 წლამდე თვითონ ხელმძღვანელობდა; 1983-1992წწ. იგი იყო სატრანსპორტო ფაკულტეტის დეკანი; 1992 წელს იგი საქართველოს რესპუბლიკის ტრანსპორტის მინისტრად დაინიშნა; შემდგომში იგი მოღვაწეობდა გამომცემლობა "ტექნიკური უნივერსიტეტის" დირექტორად; პარალელურად იყო მის მიერვე შექმნილი კათედრის პროფესორი. 81 სამეცნიერო ნაშრომის, 27 გამოგონების, 7 სასწავლო სახელმძღვანელოს და 4 მეთოდური მითითების ავტორია; სხვებთან ერთად პირველად შექმნა ქართულ ენაზე სარკინიგზო ავტომატიკის, ტელემექანიკის და კავშირგაბმულობის ტერმინოლოგია; მისი გამოგონებები ექსპონირებული იყო ესპანეთში, რუსეთში, ბულგარეთში, იგი არაერთგზის მონაწილეობდა სხვადასხვა სიმპოზიუმებსა და ფორუმებში. მიღებული აქვს სახელმწიფო ჯილდოები.

წყარო: გამოჩენილი ინჟინრები და მეცნიერები: კრებული/შემდგ.: მიტროპოლიტი ანანია ჯაფარიძე [და სხვ.]. -თბ., 2012. -გვ.49-50; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.93

• 1998 - ღირსების ორდენი
  ქართული ტექნიკური მეცნიერების განვითარებისა და საინჟინრო კადრების აღზრდის საქმეში შეტანილი თვალსაჩინო პირადი წვლილისათვის

• მეთოდური მითითებები ლაბორატორიული სამუშაოების შესასრულებლად სარკინიგზო კავშირგაბმულობის კოორდინატული სისტემის კ-100/2000 ტიპის ატს-ის მოწყობილობებში (შემდგენელი). - თბილისი, ტექნ. უნ-ტი, 1998. - 58გვ.
• ლაბორატორიული სამუშაოები სარკინიგზო ავტომატური სადგურების საკომუნიკაციო მოწყობილობებში (თანაავტორი). - თბილისი, ტექნ. უნ-ტის გამ-ბა, 1997. - 72გვ.
• სალიანდაგო ბლოკირება და ავტორეგულირება : მეთოდური მითითებანი ლაბორატორიული სამუშაოების ჩასატარებლად (თანაავტორი) // ნაწ. 1. - თბილისი, საქ. პოლიტექნ. ინ-ტი, 1977. - 55გვ.