იოსებ ჯიმითელი

დაბადების ადგილი: სოფელი ჯიმითი, გურჯაანის რაიონი.

იოსებ (ჯიმითელი) გეთიაშვილი იყო დაუმარცხებელი და ბეჭდაუდებელი ფალავანი ქართულ ჭიდაობაში. მას უამრავი ჯილდოა აქვს მოპოვებული არა მხოლოდ საქართველოში, მის ფარგლებს გარეთაც. მონაწილეობდა მეზობელ ქვეყნებში გამართულ შეჯიბრებებშიც და სამშობლოში დამარცხებული არასოდეს დაბრუნებულა. მისი ჭიდაობის მხილველები ჰყვებოდნენ, რომ მეტოქეზე ჯიქურ მიდიოდა და რკინისებრი გამძლეობით გამოირჩეოდა. იმდროინდელ პრესაში, რომელიც სისტემატურად აშუქებდა დედაქალაქში გამართულ საჭიდაო ტურნირებს, ნათქვამია, თუ როგორ დაამარცხა ჯიმითელმა ერთმანეთის მიყოლებით თედო ლილოელი და შაშო ვერელი. თბილისში პასპორტის გარეშე ცხოვრობდა, ამის გამო ჟანდარმებმა დაიჭირეს და ჯერ გუბერსკის ციხეში ჩასვეს, შემდეგ ორი წლით განჯაში გადაასახლეს. განჯაში იჭიდავა ზერტელ ტიელიძესთან, რომელიც წარმატებით დაამარცხა. სულ ბოლოს იოსებ ჯიმითელმა თბილისში, ნიკიტინების ცირკში, 1924 წელს იჭიდავა. მოჭიდავე.

წყარო: კახეთის გამოჩენილი ადამიანები/ოთარ ნაცარაშვილი.-თბ.,2001.-გვ.519