იოანე მუხრანბატონი

ბაგრატიონთა მუხრანბატონების შტოს წარმომადგენელი, ქართლ-კახეთის სამეფო პოლიტიკური და სამხედრო მოღვაწე, ერეკლე II-ის სიძე (მეფის ასულის ქეთევანის მეუღლე); მუხრანბატონმა, როგორც ერეკლე II-ის სრულუფლებიანმა წარმომადგენელმა, 1783 წლის 24 ივლისს გ. ჭავჭავაძესთან ერთად გეორგიევსკში ხელი მოაწერა რუსეთის მფარველობაში შესვლის ტრაქტატს; 1784-იდან მუხრანბატონი იყო ერეკლე II-ისა და გიორგი XII-ის სახლთუხუცესი; 1784–1795წწ. ერევნის სახანოს (ქართლ-კახეთის სამეფოს ვასალის) მოურავი ("ღუბერნატორი"). 1786 წელს ჩააქრო აჯანყება ნახჭევანში; 1795 წელს კრწანისის ბრძოლაში მეთაურობდა ქართლ-კახეთის ლაშქრის ერთ ნაწილს. გარდაცვალების თარიღი 1801 წელი, სხვა ცნობებით 1799 წელი.

წყარო: ქართული საბჭოთა ენციკლოპედია: ტ. 7.- თბ., 1984. - გვ. 231