რიხარდ მეკელაინი

დაბადების ადგილი: სოფელი არნშტაინი, ბავარია.

გერმანელი ენათმეცნიერი, ლექსიკოგრაფი, ქართველოლოგი და სლავისტი. დაამთავრა ბერლინის უნივერსიტეტი. 1914 წლიდან მუშაობდა ბერლინის სამეფო (1919 წლიდან პრუსიის) სახელმწიფო ბიბლიოთეკაში. 1921 წლიდან ბერლინის უნივერსიტეტში კითხულობდა ქართული, რუსული, პოლონური, სამხრეთ სლავური და ესპანური ენების კურსს. 1922 წელს მისი ინიციატივით ბერლინში შეიქმნა "რუსთაველის საზოგადოება". ამავე წელს დააარსა ჟურნალი "მორგენლანდია ("Morgenland"), რომლის პირველი ნომერიც მთლიანად საქართველოსა და კავკასიას მიეძღვნა. მისივე თაოსნობით შეიქმნა გამომცემლობა "ახლო აღმოსავლეთი", რომელშიც იბეჭდებოდა ქართულ-გერმანული კულტურული ურთიერთობის ამსახველი მასალები. 1919 წელს მან ბერლინში გამოსცა წიგნი "ბერლინის სახელმწიფო ბიბლიოთეკაში და პრუსიის წიგნსაცავში არსებული ქართული გრამატიკებისა და ლექსიკონების ბიბლიოგრაფია". მასვე ეკუთვნის "გერმანული ენის სახელმძღვანელო ქართველთათვის" (ბერლინი 1918, 1922, 1931), "ქართულ-გერმანული სიტყვანი" (ბერლინი-ლაიფციგი, 1928), "გერმანულ-ქართული ლექსიკონი" (ნაწ. I, ბერლინი, 1937, ნაწ. 2, ლაიფციგი, 1943).

წყარო: ქართული ენა: ენციკლოპედია. - თბ. 2008. - გვ.310

• გერმანული ენის სახელმძღვანელო ქართველთათვის = Deutshen Sprache für Georgier (ავტორი). - ბერლინი, 1931. - 264გვ.
• გერმანული ენის სახელმძღვანელო: ქრესტომატიითა და ლექსიკონით (ავტორი). - ბერლინი, გამომცემლობა "Naher Osten", 1922. - 203გვ.