ფრიდრიხ კარლ ნაისერი

დაბადების ადგილი: ვენა (ავსტრია).

ავსტრიელი ენათმეცნიერი. სწავლობდა ვენის ერთ-ერთ რეალურ სასწავლებელში, რომლის დამთავრების შემდეგ, 1928 წელს, სწავლა განაგრძო ვენის უნივერსიტეტში. ეუფლებოდა ანგლისტიკასა და ამერიკანისტიკას, ისმენდა ლექციებს სირიულის, ხეთურისა და აფრიკული ენების შესახებ. მალე შეუდგა კავკასიური ენების, უწინარეს ყოვლისა, ქართულის შესწავლას. 1936 წელს დაიცვა დისერტაცია თემაზე: "შტუდიები ქართული სიტყვაწარმოებისათვის" ("Studien zur georgischen Worbildung"). ამ დროიდან იგი ქართველ ენათმეცნიერთა ყურადღებას იქცევდა (ცნობილია მისი კონტაქტები ა. შანიძესთან). მისი დისერტაცია (რ. ბლაიხშტაინერის წინასიტყვაობით) წიგნად გამოსცა 1953 წელს გ. დეეტერსმა და იგი მაშინვე აღიარეს ქართველ ენათმეცნიერთა წრეებში. გაჩნდა ამ ნაშრომის ქართულად თარგმნის იდეა (გ. მაჭავარიანი).

წყარო: ქართული ენა: ენციკლოპედია. - თბ. 2008. - გვ.342

• Studien zur Georgischen Wortbildung : [microfilm] (ავტორი). - Wiesbaden , GMBH, 1953. - 90p.